Ihooya rĩa Azaria
1 Aanake acio atatũ Anania, na Mishaeli, na Azaria makĩambĩrĩria kũũrũũra kũu nĩnĩmbĩinĩ cia mwaki makĩinagĩra Ngai nyĩmbo magĩkumagia Mwathani.
2 Naake Azaria akĩrũũgama kũu mwakiinĩ gatagatĩ akĩhooya na mũgambo mũnene atĩrĩ,
3 “Mwathani Ngai wa maithe maitũ nĩtwagũkumia na twagũtĩĩa; rĩĩtwa rĩaku nĩrĩkumagio nginya tene na tene.
4 Amu maũndũinĩ moothe ũtwĩkĩĩte ũrĩa kwagĩrĩire. Ciĩko ciaku ciothe nĩ cia ma, na njĩra ciaku nĩnjagĩrĩru, na itua rĩaku o rĩothe nĩ rĩa kĩhooto.
5 Nĩwekire ũrĩa kwagĩrĩire rĩrĩa wareehire itũhũũhũ Jerusalemu itũũra rĩrĩa itheru rĩa maithe maitũ. Nĩ gũkorwo nĩtwagĩrĩirwo gũtuĩrwo ũguo tondũ wa meehia maitũ.
6 Amu nĩtwĩhĩĩtie na tũkagera ngero tũgagũtiganĩria. Ĩĩ nĩtwĩhĩĩtie na tũkaaga gwathĩkĩra maathani maaku.
7 Ithuĩ nĩtwagire kũmarũmĩrĩra kana kũhingia ũrĩa ũtwathĩĩte. Korwo nĩtwathĩkĩire mawatho maaku nĩtũngĩikarĩĩte wega.
8 Kwoguo ũrĩa wothe ũtwĩkĩĩte, nĩguo twagĩrĩirwo nĩgwĩkwo.
9 Nĩũtũneanĩĩte kũrĩ thũ ciitũ, andũ matooĩ watho, andũ maiyũirwo nĩ rũthũũro, o na kũrĩ mũthamaki ũrĩa ũtarũmagĩrĩra kĩhooto, o ũrĩa mwaganu mũno thĩinĩ wa thĩ yothe.
10 Ithuĩ rĩu tũtingĩhota gũtumũra tũnua twitũ; ithuĩ ndungata ciaku iria igũthaathayagia nĩtũgĩĩte gĩconoko na thoni.
11 “No nĩ ũndũ wa gĩtĩĩo gĩaku wee mwene-rĩ, ndũkaae gũthũũkia kĩrĩĩkanĩro giitũ nawe ũgĩtũtiganĩrie nginya tene na tene.
12 Ndũkaae gũtwehereria tha ciaku. Hingia kĩrĩĩkanĩro gĩaku kĩrĩa werĩire Aburahamu ũrĩa wendeete mũno, o kĩrĩa werĩire Isaaka ndungata yaku, o na ũkĩĩrĩra Jakubu ũrĩa ithe wa Aisiraeli andũ aaku arĩa atheru.
13 Wee nĩwameerĩire atĩ nĩũkaamahe njiarwa nyingĩ o ta njata cia matuinĩ kana ta mũthanga wa hũgũrũrũinĩ cia iria.
14 No rĩu ithuĩ, Mwathani, nĩtũnyiihĩĩte gũkĩra ndũũrĩrĩ iria ingĩ ciothe; kũrĩa guothe tũtũũraga thĩinĩ wa thĩ tũikaraga tũrĩ na thoni nĩ ũndũ wa meehia maitũ.
15 Ithuĩ rĩu tũtirĩ na mũthamaki kana mũnabii, kana mũtongoria. Tũtirĩ na hekaarũ gwa kũrutĩra magongoona ma njino, o na mahaki, na iheeo, o na kana ũbaani. Tũtirĩ handũ tũngĩthiĩ tũkũrutĩre magongoona nĩguo tuone tha ciaku.
16 No rĩu nĩtuoka kũrĩ we ngoro ciitũ ihereete na maroho maitũ menyiihĩĩtie, tũgĩgũthaitha ũtwamũkĩre o ta tũũkĩĩte na magongoona ma njino ma ndũrũme, ndeegwa o na tũtũrũme ngiri nyingĩ.
17 Amũkĩra kwĩrira gwitũ gũtariĩ ta igongoona tũkũrutĩire ũũmũũthĩ; tũrokũrũmĩrĩra kũna, amu mũndũ o wothe ũkwĩhokeete ndagaaconorithio.
18 Ithuĩ rĩu nĩtũrĩkũrũmagĩrĩra na ngoro ciitũ ciothe; nĩtũrĩgũthaathayagia na tũkũhooyage.
19 Ndũgaatũconorithie no tũkirĩrĩrie na ũtũiguĩre tha.
20 Ũũi, Mwathani, ringa kĩama ũtũhonokie, na ũkĩgoocithie rĩĩtwa rĩaku.
21 “Andũ arĩa maherithagia ndungata ciaku maconorithie. Maimithie gĩtĩĩo na ũmatuunye ũhoti na ũnene wao wothe. Hinya wao naguo ũhehenje.
22 Mamenyithie atĩ wee wiki nĩ we Mwathani, na nĩ we Ngai, na wathaga thĩ yothe na ũndũ wa hinya waku.”
23 Ndungata cia mũthamaki iria ciamaikĩĩtie mwakiinĩ itiatigithagĩria kuongerera icuainĩ rĩa mwaki maguta, na rami, na ũguta, na mathĩgĩ moomũ.
24 Naruo rũrĩrĩmbĩ rũkĩneneha rũkĩambata na igũrũ ta mita mĩrongo ĩĩrĩ;
25 rũgĩkĩneneha, rũkĩhuruutwo na mĩena rũgĩcina andũ a Babiloni arĩa maarĩ hakuhĩ na icua rĩu.
26 No mũraika wa Mwathani agĩikũrũka agĩtoonya icuainĩ rĩu harĩa Azaria na andũ acio angĩ eerĩ maarĩ. Nĩariĩrĩire rũrĩrĩmbĩ,
27 agĩtũma hau icua gatagatĩ hahaane ta haarĩ karũhuuho kahehu kaahuruutanaga. Kwoguo mwaki ndwamahuutirie, kana ũkĩmacina, o kana ũkĩmathumbũra.
Rwĩmbo rwa aanake acio atatũ
28 Nao aanake acio atatũ marĩ kũu icuainĩ rĩa mwaki makĩinĩra Ngai makĩmũgooca na makĩmũkumia na mũgambo ũmwe makiuga atĩrĩ:
29 Nĩtwagũkumia wee Mwathani Ngai wa maithe maitũ.
Wee ũrĩ wa gũkumio na gũtũũgĩrio nginya tene na tene.
30 Rĩĩtwa rĩaku itheru na rĩrĩ riiri rĩgoocagwo.
Nĩ rĩa gũkumio na gũtũũgĩrio nginya tene na tene.
31 Wee ũroinagĩrwo nyĩmbo cia gũkũgooca nginya tene na tene.
Na wee ũrogoocagwo thĩinĩ wa Hekaarũ ĩyo,
32 kũrĩa wee ũikarĩire gĩtĩ gĩaku kĩa ũnene igũrũ wa ciũmbe iria i muoyo,
ũgacũũthagĩrĩria thĩ kũrĩa arĩa akuũ mathiaga.
Wee ũrĩ wa gũkumio na gũtũũgĩrio nginya tene na tene.
33 Wee ũrokumio ũikarĩire gĩtĩ gĩaku kĩa ũnene.
Ũnene waku ũroinagĩrwo nyĩmbo cia gũkũgooca nginya tene na tene.
34 Wee ũrokumio kũu igũrũ matuinĩ.
Ũnene waku ũroinagĩrwo nyĩmbo cia gũkũgooca nginya tene na tene.
35 “Inyuĩ ciũmbe ciothe goocaai Mwathani;
mũgooceei na nyĩmbo na mũmũtũũgĩrie nginya tene na tene.
36 Inyuĩ igũrũ matuinĩ goocaai Mwathani;
mũgooceei na nyĩmbo na mũmũtũũgĩrie nginya tene na tene.
37 Inyuĩ araika oothe a Mwathani, goocaai Mwathani;
mũgooceei na nyĩmbo na mũmũtũũgĩrie nginya tene na tene.
38 Inyuĩ maaĩ moothe marĩa me igũrũ rĩa matu goocaai Mwathani;
mũgooceei na nyĩmbo na mũmũtũũgĩrie nginya tene na tene.
39 Inyuĩ maahinya moothe ma igũrũ goocaai Mwathani;
mũgooceei na nyĩmbo na mũmũtũũgĩrie nginya tene na tene.
40 Inyuĩ riũa na mweri goocaai Mwathani;
mũgooceei na nyĩmbo na mũmũtũũgĩrie nginya tene na tene.
41 Inyuĩ njata cia matuinĩ goocaai Mwathani;
mũgooceei na nyĩmbo na mũmũtũũgĩrie nginya tene na tene.
42 Inyuĩ mbura na rũthuthuũ goocaai Mwathani;
mũgooceei na nyĩmbo na mũmũũtũgĩrie nginya tene na tene.
43 Inyuĩ huuho ciothe goocaai Mwathani;
mũgooceei na nyĩmbo na mũmũtũũgĩrie nginya tene na tene.
44 Inyuĩ mwaki na ũrugarĩ goocaai Mwathani;
mũgooceei na nyĩmbo na mũmũtũũgĩrie nginya tene na tene.
45 Inyuĩ mbaa na ũrugarĩ mũhiũ goocaai Mwathani;
mũgooceei na nyĩmbo na mũmũtũũgĩrie nginya tene na tene.
46 Inyuĩ ime na tharunji goocaai Mwathani;
mũgooceei na nyĩmbo na mũmũtũũgĩrie nginya tene na tene.
47 Inyuĩ mũthenya na ũtukũ goocaai Mwathani;
mũgooceei na nyĩmbo na mũmũtũũgĩrie nginya tene na tene.
48 Inyuĩ ũtheri na nduma goocaai Mwathani,
mũgooceei na nyĩmbo na mũmũtũũgĩrie nginya tene na tene.
49 Inyuĩ mbarabu na heho goocaai Mwathani;
mũgooceei na nyĩmbo na mũmũtũũgĩrie nginya tene na tene.
50 Inyuĩ kĩbii na ira goocaai Mwathani;
mũgooceei na nyĩmbo na mũmũtũũgĩrie nginya tene na tene.
51 Inyuĩ rũheni na matu goocaai Mwathani;
mũgooceei na nyĩmbo na mũmũtũũgĩrie nginya tene na tene.
52 “Thĩ nĩgooce Mwathani;
nĩmũgooce na nyĩmbo na ĩmũtũũgĩrie nginya tene na tene.
53 Inyuĩ irĩma na ithũngũri goocaai Mwathani;
mũgooceei na nyĩmbo na mũmũtũũgĩrie nginya tene na tene.
54 Inyuĩ indo ciothe ikũraga goocaai Mwathani;
mũgooceei na nyĩmbo na mũmũtũũgĩrie nginya tene na tene.
55 Inyuĩ iria na njũũĩ goocaai Mwathani;
mũgooceei na nyĩmbo na mũmũtũũgĩrie nginya tene na tene.
56 Inyuĩ ithima goocaai Mwathani,
mũgooceei na nyĩmbo na mũmũtũũgĩrie nginya tene na tene.
57 Inyuĩ nyamungumĩ na nyamũ iria ciothe ciikaraga maaĩinĩ goocaai Mwathani;
mũgooceei na nyĩmbo na mũmũtũũgĩrie nginya tene na tene.
58 Inyuĩ nyoni ciothe goocaai Mwathani;
mũgooceei na nyĩmbo na mũmũtũũgĩrie nginya tene na tene.
59 Inyuĩ mahiũ moothe na nyamũ cia gĩthaka ciothe goocaai Mwathani;
mũgooceei na nyĩmbo na mũmũtũũgĩrie nginya tene na tene.
60 “Inyuĩ andũ oothe goocaai Mwathani;
mũgooceei na nyĩmbo na mũmũtũũgĩrie nginya tene na tene.
61 Inyuĩ andũ a Isiraeli goocaai Mwathani;
mũgooceei na nyĩmbo na mũmũtũũgĩrie nginya tene na tene.
62 Inyuĩ athĩnjĩri Ngai goocaai Mwathani;
mũgooceei na nyĩmbo na mũmũtũũgĩrie nginya tene na tene.
63 Inyuĩ ndungata cia Mwathani goocaai Mwathani;
mũgooceei na nyĩmbo na mũmũtũũgĩrie nginya tene na tene.
64 Inyuĩ andũ arĩa athingu goocaai Mwathani;
mũgooceei na nyĩmbo na mũmũtũũgĩrie nginya tene na tene.
65 Inyuĩ andũ arĩa atheru na arĩa enyiihia goocaai Mwathani;
mũgooceei na nyĩmbo na mũmũtũũgĩrie nginya tene na tene.
66 Inyuĩ Hanania, na Azaria na Mishaeli goocaai Mwathani;
mũgooceei na nyĩmbo na mũmũtũũgĩrie nginya tene na tene.
Nĩatũhonokirie kuuma kũrĩ akuũ,
na agĩtũhonokia kuuma gĩkuũinĩ,
o na agĩtũhonokia kuuma icuainĩ rĩa mwaki;
agĩgĩtũhonokia kuuma mwakiinĩ.
67 Cookeriai Mwathani ngaatho tondũ nĩ mwega,
tondũ ũtugi wake nĩ wa tene na tene.
68 Andũ oothe arĩa mũthaathayagia Mwathani Ngai wa ngai ciothe mũgooceei;
mũgooceei na nyĩmbo na mũmũcookerie ngaatho,
tondũ ũtugi wake nĩ wa tene na tene.”