Ũthaka wa Susana kũguucĩrĩria athuuri eerĩ atui ciira
1 Hĩndĩ ĩmwe itũũrainĩ rĩa Babiloni nĩgwatũire mũthuuri wetagwo Joakimu.
2 Mũthuuri ũcio nĩahikĩĩtie mũtumia wetagwo Susana mwarĩ wa Hilikia. Mũtumia ũcio aarĩ mũthaka mũno na nĩaheete Ngai gĩtĩĩo mũno.
3 Aciari aake, maarĩ andũ eetĩkia mũno na nĩmaarereete mũirĩĩtu ũcio wao kũringana na Watho wa Musa.
4 Joakimu naake aarĩ gĩtonga kĩnene mũno, na aarĩ na mũgũnda mwega wa kũhuurũkwo gũkuhĩ na nyũmba yake. Ayahudi arĩa angĩ maacemanagĩria kũu tondũ nĩmaamũheete gĩtĩĩo mũno.
5-6 Andũ mangĩendire gũtuithanio maatwaraga ciira wao kwa Joakimu tondũ kaingĩ nĩgwakoragwo na athuuri eerĩ a gũtua maciira. Na rĩĩrĩ, mwaka ũcio athuuri eerĩ nĩmaathuurĩĩtwo a gũtuithania andũ. Athuuri ta acio nĩ o Mwathani aarĩĩtie ũhoro wao akoiga atĩrĩ, “Waganu ũtoonyeete Babiloni, ũgatoonyio nĩ athuuri na atuithania ciira marũũgamĩĩte ta atongoria.”
7 Na rĩĩrĩ, thaa thita andũ maarĩĩkia kuumĩra wĩra, Susana nĩathiaga gũceeraceera mũgũndainĩ ũcio wa mũthuuriwe.
8 Nao athuuri acio eerĩ nĩmaamuonaga mũthenya o mũthenya agĩthiĩ gũceera, nao makĩambĩrĩria kũmwĩrirĩria.
9 Wendo ũcio wamariitirie o nginya magĩte gĩtaranio makĩriganĩrwo nĩkũhooya Ngai, o na ũhoro wa mĩtugo mĩega.
10 Kũmwĩrirĩria kũu kwamarĩĩte o ta njoohi no gũtirĩ weraga ũrĩa ũngĩ
11 nĩ gũkorwo nĩmaaconokaga kuumbũra atĩ nĩmeeriragĩria gũkoma naake.
12 No mũthenya o mũthenya o eerĩ nĩmaacaragia mweke wa kũmwĩrorera.
13 Na rĩĩrĩ, mũthenya ũmwe nĩmeeranire atĩrĩ, “Nĩtũinũke, thaa thita nĩyakinya,” nao makiumagara o mũndũ na njĩra yake.
14 No o mũndũ agĩcooka na thuutha, makĩĩyona hi na hi marĩ hamwe ũthiũ kwa ũthiũ. Thuutha wa kũũrangania, o eerĩ makiumbũranĩra atĩ gũtirĩ ũtamwĩriragĩria, kwoguo makĩiguanĩra meethe mweke mwega wa rĩrĩa arĩ wiki.
Athuuri atui ciira kũgeria kũhĩtithia Susana
15 Kuuma hau magĩthiĩ na mbere gweterera mweke mwega. Na rĩĩrĩ, mũthenya ũmwe Susana agĩthiĩ o ta mũtugo arĩ na airĩĩtu eerĩ arĩa mamũtungatagĩra, na nĩ mũthenya warĩĩte riũa mũno, naake nĩendaga gwĩthambĩra kũu mũgũndainĩ ũcio.
16 Mũthenya ũcio gũtiarĩ mũndũ ũngĩ kũu o tiga athuuri acio eerĩ arĩa maamuoheirie mehithĩĩte.
17 Kwoguo Susana agĩkĩĩra ndungata icio ciake cia airĩĩtu atĩrĩ, “Thiĩi mũndeehere maguta ma kwĩhaka na mũhinge mĩrango mũira ndĩthambe.”
18 Nao magĩĩka ũrĩa meerirwo, magĩtiga maahinga kĩhingo kĩa mũgũnda magĩcooka nyũmba na mũrango wa mwena, nĩ geetha magacarie kĩrĩa aameetĩĩtie. No airĩĩtu acio matiigana kuona kana kũmenya ũhoro wa athuuri acio tondũ nĩkwĩhitha meehithĩĩte.
19 Airĩĩtu mathiĩ o ũguo-rĩ, athuuri acio makiumĩra kũrĩa meehithĩĩte, magĩteng’era kũrĩ Susana.
20 Makĩmwĩra atĩrĩ, “Taone! Kĩhingo kĩa mũgũnda nĩkĩhinge na gũtirĩ mũndũ ũngĩtuona. Nĩtũrakwenda, kwoguo gĩĩtĩkĩre tũkome nawe!
21 Warega, ithuĩ ithuerĩ nĩtũkaaruta ũira atĩ kũrĩ mwanake mũraarĩ naake, nĩkĩo ũraingatire ndungata ciaku cia airĩĩtu.”
22 Susana akĩhũũmũka akiuga atĩrĩ, “O ũrĩa ndĩĩka-rĩ, ndĩ hatĩkainĩ! Ndeetĩkĩra, nĩkuuga no ngooragwo nĩ ũndũ wa gũtharia. Ndaarega, ndihota kwĩhonokia harĩ inyuĩ.
23 No rĩĩrĩ, nĩ kaba ngue mookoinĩ maanyu iteehĩĩtie handũ ha kũhĩtĩria Mwathani.”
24 Agĩcooka agĩkayũrũrũka na kayũ kanene o ta ũrĩa angĩahotire. Athuuri acio eerĩ nao makĩambĩrĩria kũmuugĩrĩria makĩmũigagĩrĩra igeenyo.
25 Ũmwe wao akĩhanyũka akĩhingũra kĩhingo.
26 Andũ a mũciĩ maigua mbugĩrĩrio kũu mũgũndainĩ, magĩteng’era kĩhingoinĩ kĩa mwena makoone kĩrĩa gĩakorerera Susana.
27 Athuuri maarĩĩkia kũheana rũgano rwao, ndungata icio ikĩmaka mũno, nĩ gũkorwo gũtiarĩ ũndũ ta ũcio waiguĩtwo igũrũ rĩa Susana mbere ĩyo.
Athuuri kũruta ũira mũũru igũrũ rĩa Susana
28 Mũthenya ũrĩa warũmĩrĩire, andũ nĩmaagomanire mũciĩ kwa mũthuuriwe Joakimu. Nao athuuri arĩa eerĩ magĩkinya kuo mehotoreete biũ gũtwarithia na mbere mũbango wao mũũru wa kũũragithia Susana.
29 Nao marĩ mbere ya mũingĩ wothe makiuga atĩrĩ, “Tũmanĩraai Susana mwarĩ wa Hilikia, mũka wa Joakimu.” Agĩgĩtũmanĩrwo,
30 naake agĩũka mareehanĩĩte na aciari aake, ciana ciake na andũ aao oothe.
31 Atĩrĩĩrĩ, Susana aarĩ mũtumia weconokeire na mũthaka ũguo akĩĩrorerwo.
32 Athuuri acio ndũrĩka maathanire ahumbũrio nĩguo makenie maitho maao makĩĩrorera ũthaka ũcio wake.
33 No andũ aao na arĩa angĩ oothe mamuona no kũrĩra maarĩraga.
34 Athuuri arĩa makĩrũũgama mbere ya mũingĩ, makĩigĩrĩra mooko maao igũrũ rĩa mũtwe wa Susana.
35 Naake Susana agĩtiira maitho na igũrũ arĩ na maithori maingĩ amu nĩehokeete Ngai.
36 Athuuri makiuga atĩrĩ, “Nĩgũceera tũraceerangaga ithuĩ eerĩ kũu mũgũndainĩ naake mũtumia ũyũ arooka arĩ na ndungata ciake igĩrĩ. Arahinga kĩhingo kĩa mũgũnda, aracooka araingata ndungata icio.
37 Na rĩĩrĩ, mwanake ũrehithĩĩte arathiĩ kũrĩ we, arakoma naake.
38 Tũrĩ o rũteereinĩ rwa mũgũnda nĩtũronire ũmaramari ũcio ũgĩĩkĩka, tũrakĩhanyũka na kũrĩ o.
39 Na o na gũtuĩka nĩtũramoonire me hamwe, tũtinahota kũnyiita mũndũ mũrũme ũcio, nĩ gũkorwo nĩaratũkĩririe hinya, arahingũra kĩhingo aroora.
40 No nĩtũranyiitire mũtumia ũyũ, tũramũũria mũndũ mũrũme ũcio araarĩ ũ,
41 ararega gũtwĩra. Ũcio nĩguo ũira witũ.”
Tondũ athuuri acio maarĩ atongoria na atuithania a mũingĩ, kĩrĩndĩ gĩkĩmeetĩkia na Susana agĩtuĩrwo kũũragwo.
42 Susana nĩarĩrire oigĩrĩirie mũno akiuga atĩrĩ, “Ngai wa tene na tene, nĩũũĩ maũndũ moothe marĩa mahithe na ũndũ o wothe mbere ya wĩkĩke.
43 Nĩũũĩ atĩ athuuri aya nĩmaheana ũira wa maheeni igũrũ rĩakwa. Rĩu ndagĩthiĩ gũkua o na itarĩ na wĩhia o na ũrĩkũ wa maũndũ macio moothe manjigĩrĩra?”
Mwathani nĩaiguire kĩrĩro gĩake.
44 Na rĩrĩa oimagaragio akooragwo,
45 Mwathani akĩarahũra roho mũtheru ũrĩa watũũraga thĩinĩ wa mwanake wetagwo Danieli,
46 naake Danieli akĩgũũthũka akiuga atĩrĩ, “Niĩ ndirĩ na inyuĩ gĩkuũinĩ kĩa mũtumia ũyũ!”
47 Andũ oothe maigua ũguo makĩmũhũgũkĩra makĩmũũria atĩrĩ, “Ũrenda kuuga atĩa na ũhoro ũcio?”
48 Naake arũngiĩ o hau gatagatĩ ka mũingĩ agĩcookia atĩrĩ, “Andũ a Isiraeli, kaĩ mũrĩ akĩĩgu atĩa nĩguo mũtuĩre mwarĩ wa Isiraeli mũtamũthikĩrĩirie na mũkeehe thĩĩna wa gũcaria ũũma harĩa ũrĩ?
49 Cookiai ciira ũyũ riiko. Amu athuuri acio maheanĩĩte ũira wa maheeni igũrũ rĩake.”
50 Kwoguo andũ oothe magĩgĩcooka na ihenya o harĩa ciira watuĩrĩirwo. Athuuri magĩkĩĩra Danieli atĩrĩ, “Ũka ũikarĩre gĩtĩ hamwe na ithuĩ na ũtwĩre ũrĩa ũroiga, amu Ngai nĩakũheete ũũgĩ ũrĩa ũkoragwo na athuuri.”
51 Danieli agĩkĩmeera atĩrĩ, “Eheranĩriai athuuri acio eerĩ, na mũreke ndĩmoorie ciũria, ũmwe kwa ũmwe.”
52 Maarĩĩkia kũmaamũrania, Danieli akiuga ũmwe wao areehwo mbere yake, akĩmwĩra atĩrĩ, “Ũkũrĩire meehiainĩ na meehia ma wĩthĩ waku nĩmagũcookereire.
53 Ũtuaga matua matarĩ ma kĩhooto, ũgatuĩra arĩa matarĩ na mahĩtia, na ũkarekereria arĩa marĩ na mahĩtia, o na akorwo Mwathani oigĩĩte, ‘Ndũkooragithie mũndũ ũtarĩ na ihĩtia na mũndũ mũthingu.’
54 Rĩu-rĩ, tondũ nĩũronire mũtumia ũcio wega-rĩ, tanjĩĩra ũramoonire makomeete rungu rwa mũtĩ ũrĩkũ?”
Naake agĩcookia atĩrĩ, “Rungu rwa mũringa.”
Naake Danieli akiuga atĩrĩ, “Nĩ wega!
55 Mahĩtia maaku nĩmathiũrũrũkĩirie mũtwe waku. Mũraika wa Mwathani nĩarĩĩkĩĩtie kwamũkĩra ituĩro rĩaku kuuma kũrĩ Ngai na nĩegũkũringa agũtinanie keerĩ.”
56 Danieli agĩgĩathana atĩ mũthuuri ũcio eeherio, na atĩ ũrĩa ũngĩ areehwo mbere yake. Aareehwo, Danieli akiuga atĩrĩ, “We ũrĩ maciaro ma Kanaani, no ti ma Juda! Ũthaka nĩũkũguucĩrĩirie, naguo waganu ũkahĩtithia ngoro yaku!
57 Ũguo nĩguo ũtũire wĩkaga na ciana cia airĩĩtu cia Isiraeli, amu nĩiragwĩtigagĩra mũno na ikaremwo nĩgwĩtiiria. No haaha harĩ na mwarĩ wa Juda ũtangĩraahotire kũmeria waganu waku!
58 Rĩu-rĩ, tanjĩĩra ũramahahũrire rungu rwa mũtĩ ũrĩkũ?”
Naake agĩcookia atĩrĩ, “Rungu rwa mũkũyũ.”
59 Naake Danieli akiuga atĩrĩ, “Nĩ wega! Ũrokũyũka ta maheeni maaku! Mũraika wa Ngai nĩagwetereire arĩ na rũhiũ rwa njora agũkũyũkanie keerĩ nĩguo amũũrage inyuĩ eerĩ.”
60 Kĩrĩndĩ gĩothe gĩkiugĩrĩria na kayũ kanene gĩkĩgooca Ngai ũrĩa ũhonokagia arĩa mamwĩhokaga.
61 Gĩgĩcooka gĩgĩũkĩrĩra athuuri acio eerĩ arĩa kuumana na mĩario yao Danieli oonanirie atĩ nĩmaaheanĩĩte ũira wa maheeni,
62 na kũringana na Watho wa Musa gĩkĩmatuĩra o ta ũrĩa nao maatuĩrĩire mwarĩ wa ithe wao. Gĩkĩmooraga, nayo thakame ĩtarĩ na ihĩtia ĩkĩhonokio mũthenya ũcio.
63 Hilikia na mũtumia wake makĩgaatha Ngai nĩ ũndũ wa Susana mwarĩ wao. Joakimu mũthuuri wa Susana na andũ aao oothe magĩĩka o ta ũguo nĩ gũkorwo Susana nĩoneetwo atarĩ na mahĩtia.
64 Kuuma mũthenya ũcio gũthiĩ na mbere Danieli akĩheeo gĩtĩĩo kĩnene maithoinĩ ma mũingĩ.