Gũcaria waragania
1 Inyuĩ atongoria a gũũkũ thĩ endaai waragania.
Wĩhokeku nĩũtongoragie meciiria maanyu harĩ Mwathani.
Gũcaria mũmũcaragie na wĩnyiihia wa ngoro.
2 Nĩ gũkorwo oonagwo nĩ arĩa matamũgeragia.
We-rĩ, nĩeyonithagia arĩa matatigaga kũmwĩrĩgĩrĩra.
3 Meciiria magonyoku nĩgũtigithũrana matigithũranaga andũ na Ngai.
Na rĩĩrĩ, Mwene Hinya Wothe angĩgerio-rĩ,
nĩgũturuuria aturuuragia arĩa irimũ.
4 No rĩĩrĩ, ũũgĩ ndarĩ hingo angĩikara thĩinĩ wa muoyo wĩ na ũrambu
ningĩ-rĩ, ndangĩikara thĩinĩ wa mwĩrĩ ũrĩa wĩnenganĩrĩĩte kũrĩ meehia.
5 Mũndũ mũtheru, nĩgũthengera athengagĩra ungumania;
aikaraga haraihu na meciiria ma ũrimũ,
na akainaina oona ũũru ũgĩĩkwo.
Ngai nĩoĩ meciiria maitũ
6 Nĩ gũkorwo ũũgĩ nĩ muoyo ũrĩa wendeete andũ;
ndoohagĩra mũndũ ũrĩa ũrumaga Ngai.
Nĩ gũkorwo Ngai nĩonaga mũndũ o thĩinĩ biũ,
akabaaraga wega ngoro yake na agathikagĩrĩria mĩario yake.
7 O na gũkorwo muoyo wa Ngai, nĩkũiyũra ũiyũire gũũkũ thĩ guothe,
roho ũrĩa ũgwatanagia indo ciothe-rĩ, nĩũmenyaga maũndũ moothe marĩa maaragio.
8 Kwoguo-rĩ, mũndũ wothe ũrĩa waragia mĩgambo ĩtarĩ ya ma-rĩ, ndangĩhithĩka,
nakuo kũherithio-rĩ, gũtikaamũhĩtũkĩrĩra.
9 Nĩ gũkorwo meciiria ma mũndũ ũrĩa mũũru nĩmagaathuuthuurio,
na ũira wa mĩgambo yake nĩũgaakinyĩra Mwathani
nĩ geetha atuĩrwo nĩ ũndũ wa meehia maake.
10 Nĩ gũkorwo gũtũ kwa ũiru nĩkũiguaga maũndũ moothe,
o na kĩheehũ kĩa mũng’ung’uo gũtikũhĩtũkaga.
11 Wĩmenyerere, ndũkang’uung’uue tũhũ,
nyiita rũrĩmĩ rwaku rũtige gwethaga o mahĩtia
tondũ o na mũgambo wa hitho ndũkoora tũhũ.
Kanua karĩa kaaragia ũrongo nĩkũũraga kooragaga muoyo.
Ngai ndoombire gĩkuũ
12 Tigaai gũthĩĩgia gĩkuũ na mĩtũũrĩre yanyu mĩũru,
na ningĩ mũtigathoorie rĩũra na ciĩko cianyu.
13 Nĩ gũkorwo Ngai ndathondekire gĩkuũ,
na ndarũũhagia akĩona arĩa marĩ muoyo magĩthira.
14 Oombire indo ciothe itũũrage muoyo.
Indo ciothe iria ciombirwo ikoragwo na muoyo thĩinĩ wacio.
Thĩinĩ wacio-rĩ, gũtikoragwo ũrogi wa gũcithũũkia.
Gĩkuũ-rĩ, gĩtirĩ ũhoti gũũkũ thĩ.
15 Nĩ gũkorwo waragania nĩũtũũraga muoyo hĩndĩ ciothe.
16 Andũ arĩa eeki naaĩ nĩkwĩĩtĩria meĩtagĩria gĩkuũ na ciĩko na mĩario yao.
Matuaga gĩkuũ mũraata wao,
makeyonjia nĩ ũndũ wakĩo.
Mathondekaga kĩrĩĩko nakĩo
magagĩtoonyio ngwatioinĩ yakĩo.