Mwĩciirĩrie mũũru

1 Andũ arĩa eeki naaĩ na meciiria maao mahĩtanu meĩraga atĩrĩ,

“Ũtũũro witũ nĩ mũkuhĩ na wĩ na mĩnyamaaro mĩingĩ.

Gũtirĩ na ũhuurũko mũndũ oonaga akinyĩrĩrwo nĩ imiinĩro rĩake;

gũtirĩ mũndũ ũrĩ waiguuo oimĩĩte kwa arĩa akuũ.

2 Twaciarirwo tũterĩgĩrĩirwo,

na thuutha wa gũtũũra muoyo ũyũ tũkaahaana

o ta tũtaarĩ muoyo o na rĩ.

Mũhũũmũ ũrĩa ũrĩ maniũrũ maitũ-rĩ,

ũhaana o ta ndoogo;

meciiria no ta thandĩ ĩrĩa yakagio na gũtuumatuuma kwa ngoro.

3 Thandĩ ĩyo ĩngĩhora-rĩ, mwĩrĩ witũ ũgarũrũkaga ũgatuĩka mũhu

naguo muoyo ũhĩtũkaga o ta ũrĩa rũhuuho rũhĩtũkaga.

4 Thuutha wa ihinda iniini rĩĩtwa riitũ rĩkariganĩra,

na gũtirĩ mũndũ ũcookaga kũririkana wĩra ũrĩa twarutire.

Ũtũũro witũ naguo ũkahĩtũka o ta ũrĩa matu mahĩtũkaga,

na ũgathira o ta ũrĩa thaatũ ũthiraga,

ũingatagwo nĩ mĩrũri ya riũa na ũkahootwo nĩ ũrugarĩ warĩo.

5 Matukũ maitũ mahaana o ta ũrĩa kĩĩruru kĩhĩtũkaga,

gũkua gwitũ gũtĩĩra gũtingĩtĩĩrĩka.

Ruoro nĩrwĩkĩre na gũtirĩ ũngĩhota gũcooka na thuutha.”

6 Andũ acio moigaga atĩrĩ,

“Ũkaai twĩkenie na mĩago ĩrĩa ĩrĩ kuo,

na tũtũmĩre indo ciothe iria ciombirwo twĩkenie ta rĩrĩa twarĩ eethĩ.

7 Rekeei twĩkenie na ndibei iria cia goro na maguta marĩa manungi wega.

Mũtikaareke ihũa o na rĩmwe rĩa hĩndĩ ya ũrugarĩ rĩtũhĩtũke.

8 Nĩtwĩhumbeei mĩtwe thũmbĩ cia mahũa marĩa mathaka mataanahooha.

9 Mũndũ o na ũmwe ndakahĩtũkwo nĩ hĩndĩ ya gwĩkenia

na nĩtũkaaririkanagwo kũndũ guothe.

Rũu nĩruo rwĩga rwitũ na nĩruo igai rĩrĩa tũheetwo.

10 “Mũndũ ũrĩa mũthingu o na angĩkorwo arĩ mũgiĩki,

nĩtũmũhatĩrĩrie.

Nĩtũtige kũiguĩra tha mũtumia wa ndigwa,

na tũtigaacooke gũconokera andũ arĩa akũrũ,

o acio maiyũirwo nĩ mbuĩ nĩ ũndũ wa ũkũrũ.

11 Kwĩhota gwitũ nĩkuo kũrĩtuĩkaga gĩthimi kĩa ihooto,

nĩ gũkorwo mũndũ ũrĩa ũtarĩ na hinya ndarĩ ũndũ angĩĩhotera.

12 Nĩtũkungĩreei mũndũ ũrĩa mũthingu,

tondũ nĩatũraakaragia na akaregana na mĩtugo ya ũtũũro witũ.

13 Amu nĩatũkaanagia rĩrĩa twagarara watho.

Nĩatũthitangaga atĩ,

nĩtwagĩĩte thoni twaregana na ũrĩa tũrereetwo.

Etũũgagĩria atĩ nĩoĩ Ngai, na akeerahaga atĩ

we nĩ mwana wa Mwathani.

14 Harĩ ithuĩ atuĩkĩĩte wa gũthĩĩnagia thamiri ciitũ,

na nĩtũconokaga twamuona.

15 Nĩ gũkorwo ũtũũro wake nĩũreganĩĩte o biũ na ũtũũro wa andũ arĩa angĩ.

Mĩthiĩre yake nĩ ta ĩtiganĩĩte na ya arĩa angĩ.

16 We-rĩ, atũtaranagĩria na iguoya.

Gũtheema atheemaga mĩikarĩre iitũ o ta arĩ gĩko aratheema.

Oigaga atĩ marigĩrĩrio ma andũ arĩa athingu nĩ meega,

na kwĩraha akeerahaga atĩ Ngai nĩ we ithe wake.

17 Kwoguo nĩtũkĩone kana ũguo oigaga nĩguo ũhoro wa ma.

Rekeei tuone marigĩrĩrio maake magaakorwo mahaana atĩa.

18 Atĩrĩĩrĩ, akorwo mũndũ ũrĩa mũthingu nĩ mwana wa Ngai kũna-rĩ,

Ngai nĩakaamũtiirĩrĩra na amũhonokie mookoinĩ ma thũ ciake.

19 Nĩtũmũgerie, tũmũhinyĩrĩrie, tũmũmenererie na tũmũnyarare,

nĩguo tuone ũhooreri ũcio wake, na ũkirĩrĩria ũcio eerahagĩra ũrĩa ihaana.

20 Rekeei tũmũtuĩre gĩkuũ gĩa gĩcambio

tondũ nĩakaabaarĩrĩrwo nĩ Ngai ta ũguo oigaga.”

21 Ũguo nĩguo andũ arĩa eeki naaĩ meciiragia

no nĩkũhĩtia mahĩtagia.

Nĩ gũkorwo ũũru wao nĩwamatuire itumuumu.

22 Matimenyaga maũndũ marĩa moimbĩke ma Ngai.

Ningĩ-rĩ, matiĩrĩgarĩrĩra atĩ ũthingu nĩũgaatugwo.

O na matiĩciiragia atĩ andũ arĩa marĩ na ngoro nyoroku

nĩkũrĩ ũtugi makaaheeo.

23 Ngai aatũmbire tũtarĩ a gũthira,

ningĩ aatũmbire tũrĩ a mũhuanĩre wake.

24 No gĩkuũ gĩatoonyire gũũkũ thĩ na ũiru wa Caitaani;

arĩa me mwenainĩ wake nĩmagaagĩcama.