Marigĩrĩrio ma andũ arĩa athingu

1 No rĩĩrĩ, mĩoyo ya andũ arĩa athingu ĩkoragwo mookoinĩ ma Ngai.

Gũtirĩ maruo makaamĩhuutia.

2 Maithoinĩ ma andũ arĩa matarĩ oogĩ-rĩ,

moonagwo ta arĩ gũkua maakua;

gũkua kwao kũbaaragwo ta arĩ mũthiro.

3 Gũtũtiga kũrĩa matũtigaga gũkanyiitwo

ta arĩ kũniinwo maaniinwo.

4 No o-rĩ, marĩ o ro thaayũ.

O na makorwo nĩmaathĩĩnire ta ũrĩa moonagwo nĩ andũ magĩthĩĩna-rĩ,

kwĩrĩgĩrĩra kwao kwarĩ kũiyũre nĩ ũhoro wa kwaga gũkua.

5-6 Maatangĩkire o haniini,

no gũtugwo kũrĩa magaatugwo nĩ kũnene.

Nĩ gũkorwo Ngai aamageririe na akĩona atĩ nĩmamwagĩrĩire.

Aamageririe o ta ũrĩa thahabu ĩgeragĩrio mwakiinĩ,

na akĩmaamũkĩra o ta igongoona rĩa njino;

7 Hingo ĩrĩa amang’eetia nĩgũcangarara macangararaga.

Andũ arĩa athingu-rĩ, makaahenahenagia

o ta thandĩ iria ciumaga mabebeinĩ moomũ.

8 Gũtuĩra magaatuagĩra ndũũrĩrĩ,

na gwatha maathage irĩndĩ.

Mwathani agaatũũra amathamakagĩra tene na tene.

9 Arĩa merĩgagĩrĩra Mwathani-rĩ,

nĩmamenyaga ũhoro wa ma.

Na arĩa mawĩhokaga

magaatũũrania naake na wendo.

Nĩ gũkorwo ũtugi na tha nĩcietereire andũ arĩa aamũre.

Marigĩrĩrio ma arĩa eeki naaĩ

10 No rĩĩrĩ, andũ arĩa aaganu-rĩ,

nĩkũherithio makaaherithio kũringana na ũrĩa meciiria maao matariĩ.

Amu-rĩ, nĩmaatiganĩirie maũndũ ma ũthingu

makĩĩyeheria harĩ Mwathani.

11 Nĩ ma atĩ mũndũ ũrĩa ũthaahagia ũũgĩ na ũthingu

nĩ kĩeha kĩmũnyiitaga.

Wĩrĩgĩrĩro wake-rĩ, nĩ kĩndũ hatarĩ,

mĩnoga yake nayo ndĩrĩ na maciaro;

mawĩra maake matirĩ uumithio.

12 Mũtumia wake ndarĩ kĩhaarĩro,

ciana ciake o nacio no mbũramatũ;

makaarumanĩrio na njiarwa ciake.

Bata wa ũthingu

13 Kũraathimwo-rĩ, nĩ mũtumia ũrĩa thaata

angĩkorwo ndarĩ na kahĩtia,

na ndarĩ aathũũkia ũrĩrĩ wake na ũtharia.

Mũtumia ũcio-rĩ, nĩakoona maciaro

rĩrĩa Ngai agaathuuthuuria ngoro cia andũ.

14 Ningĩ kũraathimwo-rĩ, nĩ mũndũ mũrũme ũrĩa mũhakũre,

angĩkorwo ndarĩ eeka ũndũ mũũru na mooko maake,

na angĩkorwo ndarĩ hĩndĩ arĩ eciirĩria Ngai ũũru.

Nĩakaaheeo kĩheeo kĩa andũ arĩa aamũre nĩ ũndũ wa wĩhokeku wake.

Nĩakaagaya igai rĩega mũno Hekaarũinĩ ya Mwathani.

15 Ikĩro njega cionaga maciaro ma ngumo njega.

na mĩri ya ũũgĩ ndĩrĩ hingo yoraga.

16 Ciana cia itharia-rĩ, itikũraga wega,

na njiarwa cia ũmaraaya nĩgũthira ithiraga.

17 O na ingĩtũũra muoyo mĩaka mĩingĩ-rĩ,

igaataragwo ta kĩndũ hatarĩ,

na ũkũrũinĩ wacio itikaaheeo gĩtĩĩo.

18 Ĩngĩkua ĩrĩ njĩthĩ-rĩ,

itigaakorwo na kĩĩrĩgĩrĩro o na kana ũhuurũko mũthenya wa ithirĩro.

19 Nĩ gũkorwo marigĩrĩrio ma ciana cia ũtharia nĩ mooru.