Mũthamaki ahaana o ta andũ arĩa angĩ

1 Niĩ mwene-rĩ ndĩ mũndũ o ta andũ arĩa angĩ,

ndĩ mbeũ ya mũndũ ũrĩa wa mbere ũrĩa wombirwo na ndooro.

2 Ndaheereirwo mwĩrĩ thĩinĩ wa nda ya maitũ itĩĩna rĩa mĩeri kenda.

Ndaciarirwo na njĩra ya mbegũ ya mũndũ mũrũme na wendo ũrĩa uumanaga na gũkomania.

3 Atĩrĩĩrĩ, niĩ rĩrĩa ndaciarirwo

ndaguucirie rĩera o rĩrĩa rĩa mũtugo,

na ngĩgũa thĩ o ĩrĩa ĩtwamũkagĩra ithuĩ oothe.

Mũgambo wa mbere ũrĩa ndarutire no kĩrĩro, o ta andũ arĩa angĩ oothe.

4 Ndamũkĩrirwo na ngĩhumbwo na nguo cia ciana

na ngĩbaarĩrĩrwo mũno.

5 Gũtirĩ mũthamaki wambagĩrĩria na njĩra ĩngĩ.

6 Njĩra ya gũtoonya thĩ nĩihaanaine harĩ andũ oothe.

Solomoni kwenda ũũgĩ

7 Nĩ ũndũ ũcio ndahoire na ngĩheeo ũmenyo.

Ndathaithanire, naake muoyo wa ũũgĩ agĩũka kũrĩ niĩ.

8 Ndamwendire gũkĩra moothamaki na itĩ cia ũnene,

tondũ rĩĩrĩ, ũtonga ũringanĩĩtio naake-rĩ,

nĩ kĩndũ hatarĩ.

9 Ningĩ ndiamũigananirie na ihiga rĩrĩa rĩa riiri,

amu thahabu yothe iringanĩĩtio naake

no ta thanda ya mũthanga,

na kĩgera kĩa betha kĩringanĩĩtio naake

no ta ndooro.

10 Ndamwendire gũkĩra ũhoni mwega o na gũkĩra ũthaka,

ndamwendire o na gũkĩra ũtheri

tondũ ũtheri wake ndũthiraga rĩ kana rĩ.

11 Atĩrĩĩrĩ, hamwe naake

nĩndaheanĩirio o na indo ciothe iria njega.

Mookoinĩ maake-rĩ, nĩndoonire ũtonga ũtangĩtarĩka.

12 Nĩndakeneire indo icio ciothe,

tondũ nĩ ũũgĩ wacitongoreetie.

No nginya hĩndĩ ĩyo ndiamenyeete atĩ nĩ we nyina wacio.

13 Rĩu-rĩ, kĩrĩa nderutire itanogeire,

niĩ na niĩ ngũkĩmenyithania itegwĩtigĩria.

Na rĩĩrĩ, niĩ ndikũhitha ũtonga wakĩo o na atĩa.

14 Nĩ amu ũũgĩ-rĩ,

harĩ andũ nĩ mũthiithũ ũtangĩtarĩka.

Andũ arĩa mamwĩnyiitagĩra, nĩmagĩaga ũraata na Ngai,

na makagaathĩrĩrio maheeo matunda ma ũũgĩ.

15 Atĩrĩĩrĩ, Ngai nĩandeithie kwaria ta ũrĩa angĩenda;

nĩahotithie kuonania meciiria maringaine na iheeo ciake

tondũ nĩ we mũtongoria wa ũũgĩ na no we ũtaaraga andũ arĩa oogĩ.

16 Atĩrĩĩrĩ, ithuĩ oothe tũrĩ o mookoinĩ maake,

ithuĩ eene, mĩgambo iitũ, na ũmenyo witũ wothe,

o na ũmenyo wa mawĩra maitũ ma mĩthemba yothe.

17 We-rĩ, nĩ we waheire ũmenyo ũrĩa wa ma

wa maũndũ moothe marĩa marĩ kuo;

nĩ we wanyonirie mũbango wa thĩ na wa maahinya ma indo:

18 kĩambĩrĩria kĩa mahinda, gũthira kwamo o na gatagatĩ ka mo;

o na mũthiũrũrũko wa riũa na ũrĩa imera irũmanagĩrĩra.

19 Akĩnyonia ũrĩa mwaka ũgarũrũkaga

o na kũrĩa njata ciikaraga.

20 Nĩanyonirie mũũmbĩre wa nyamũ na ũrũme wa ndaara gĩthaka;

hinya wa huuho na mwĩciirĩrie wa andũ;

mĩtĩ mĩthemba na mĩthaiga mwanya mwanya kuuma mĩri ya mĩtĩ.

21 Nĩnderutire maũndũ moothe marĩa moimbĩke;

moothe marĩa marĩ ũtheriinĩ nyoneetio nĩ ũũgĩ,

22 tondũ nĩ we wamathugundire.

Mũhuanĩre wa ũũgĩ

Atĩrĩĩrĩ, thĩinĩ wake we ũũgĩ-rĩ, nĩkuo kũrĩ muoyo wa ũmenyo ũrĩa mũtheru, wa mwanya, wa mĩthemba mwanya mwanya; mwara, mũhiũ na kũmenya, mwaria wega, ũtarĩ gĩko, mũcangararu, ũtangĩthũũkĩka, muuma andũ, wa ũcamba,

23 ũtangĩtiirĩrĩka, mũtaana, wa kwenda andũ, wĩyũmĩĩtie, wa kwĩhokeka, ũtarĩ thĩĩna, wa hinya mũingĩ, ũroragĩrĩria indo ciothe, uhunguraga mĩoyo yothe ĩrĩa mĩũgĩ na mĩtheru na mĩara mũno.

24 Tondũ we ũũgĩ-rĩ, arĩ mĩtũkĩ gũkĩra mũhiũko o ũrĩkũ. Ningĩ nĩ mũtheru ũguo atĩ nĩahotaga gũtheerema na kũhamba thĩinĩ wa indo ciothe.

25 We ũũgĩ-rĩ, nĩ we mũhũũmũ wa hinya wa Ngai; nĩ we maciaro matheru ma riiri wa Mwene Hinya Wothe, na kwoguo, gũtirĩ kĩndũ gĩtarĩ gĩtheru kĩngĩhota kwĩyonera handũ thĩinĩ wake.

26 We ũũgĩ-rĩ, nĩ we gũcangarara kwa ũtheri wa tene na tene; nĩ we gĩciicio gĩtarĩ gĩko kĩa hinya ũrĩa wĩ kĩyo wa Ngai, na no we kĩĩrorerwa kĩa wega wa Ngai.

27 O na arĩ o wiki-rĩ, ũũgĩ nĩahotaga gwĩka maũndũ moothe. O na gũtuĩka we ndagarũrũkaga-rĩ, nĩgũtua atuaga indo ciothe njerũ. Thĩinĩ wa riika o riika-rĩ, atoonyaga thĩinĩ wa mĩoyo ĩrĩa mĩtheru, akamĩtua araata a Ngai o na anabii,

28 nĩ tondũ Ngai akenagĩra andũ arĩa matũũranagia na ũũgĩ.

29 We ũũgĩ nĩ mũthaka gũkĩra riũa; nĩahenagia gũkĩra njata ciothe. Angĩigananio na ũtheri-rĩ, atuĩkaga wa mbere, tondũ, ũtheri no mũhaka ũthengere ũtukũ.

30 No rĩĩrĩ, gũtirĩ ũũru o na ũrĩkũ ũngĩhoota ũũgĩ.