Solomoni kũhooya ũũgĩ

1 Ndamũthaithire ngĩmwĩra atĩrĩ,

“Wee, Ngai wa maithe maitũ, wee Mwathani muuma andũ,

nĩ we wombire indo ciothe.

2 Thĩinĩ wa ũũgĩ waku, nĩwathondekire mũndũ

nĩ geetha aathage ciũmbe iria wombire,

3 na athamakagĩre thĩ na kĩhooto na ũthingu,

na atwithanagie ciira na ũgima wa ngoro.

4 Ndagũthaitha ũnjĩtĩkĩrie ũũgĩ,

ũrĩa ũikaraga hakuhĩ na gĩtĩ gĩaku kĩa ũnene,

na ndũkanyingate, niĩ ndĩ ũmwe wa ciana ciaku.

5 Tondũ-rĩ, niĩ ndĩ ngombo yaku, mwana wa mũtumia ngombo yaku,

mũndũ ũtarĩ hinya na ũtarĩ na matukũ maingĩ ma gũtũũra muoyo,

ningĩ ndĩ na ũmenyo mũniini wa Watho na wa ũrĩa maciira matuagwo.

6 Amu kũngĩkorwo kwĩ mũndũ mũthingu gatagatĩ ga ciana cia andũ,

no akorwo agĩĩte ũũgĩ ũrĩa uumaga kũrĩ we,

mũndũ ũcio angĩtuĩka o wa tũhũ.

7 Rĩu-rĩ, wee nĩ we ũthuurĩĩte nduĩke mũthamaki igũrũ rĩa andũ aaku,

na wa gũtuithanagia ciira gatagatĩ ga ciana ciaku cia aanake na airĩĩtu.

8 Nĩũnjathĩĩte ngwakĩre nyũmba kĩrĩmainĩ gĩaku kĩrĩa gĩtheru.

Ngwakĩre kĩgongoona thĩinĩ wa itũũra rĩrĩa wambĩĩte hema yaku,

kĩhaanaine na Hekaarũ ĩrĩa yaku theru yathondekirwo kuuma o kĩambĩrĩria.

9 Rĩu-rĩ, hau hakuhĩ nawe ũũgĩ e ho.

Nĩoĩ mawĩra maaku tondũ aarĩ ho rĩrĩa wombire thĩ.

Nĩoĩ kĩrĩa kĩngĩkenia maitho maaku

na kĩrĩa kĩngĩringana na maathani maaku.

10 Ndagũthaitha mũrekerererie oime kũu igũrũ rĩaku rĩrĩa itheru.

Mũtũme oime gĩtĩinĩ gĩaku kĩa ũnene kĩrĩ riiri,

ooke tũikaranie naake na tũrutithanagie wĩra naake

na andutage maũndũ marĩa megũgũkenia.

11 Nĩ amu nĩoĩ na akamenya maũndũ moothe;

nĩarĩndongoragia na kinyi ciĩkoinĩ ciakwa na angitagĩre na riiri wake.

12 Hĩndĩ ĩyo-rĩ, maũndũ moothe marĩa ndĩĩkaga nĩmarĩtĩkĩrĩkaga;

nĩndĩathaga andũ na kĩhooto,

na njiganĩre gĩtĩinĩ kĩa baaba kĩa ũnene.

13 “Atĩrĩĩrĩ, nĩ mũndũ ũrĩkũ ũngĩmenya meciiria ma Ngai?

Nũũ ũngĩhota kũratha wendi wa Mwathani?

14 Matarania ma andũ-rĩ, ti magima, meciiria maitũ matiĩhandĩĩte.

15 Tondũ mwĩrĩ ũrĩa ũbuthaga nĩũhinyagĩrĩria muoyo.

Na hema ĩno ya rĩũmba, nĩhatagĩrĩria meciiria marĩa mararuta wĩra.

16 Nĩ hinya harĩ ithuĩ gũthuurũkania marĩa marĩ gũũkũ thĩ,

na nĩ ũritũ kũmenya marĩa matũkuhĩrĩirie.

Nĩ ũndũ ũcio-rĩ, nũũ ũngĩhota kũgundũria marĩa marĩ igũrũ?

17 Meciiria maaku-rĩ,

nũũ ũngĩhota kũmamenya

ũtangĩmwĩtĩkĩria ũũgĩ

na ũtangĩtũma roho waku mũtheru oime igũrũ?

18 Kwoguo-rĩ, tũcĩra twa andũ arĩa me gũũkũ thĩ nĩtũrũngarĩĩtio,

andũ nĩmooneetio kĩrĩa gĩgũkenagia na makahonokio nĩ ũũgĩ.”