1 Ũngĩhuutia rami nĩũgũkwĩnyiitĩrĩra,

na ũngĩtuĩka wa gũtwarana na mũndũ mwĩtĩi ũgũtuĩka taake.

2 Ndũkooe kĩndũ gĩgũkĩrĩĩtie hinya,

na ndũgaaceerage na mũndũ wĩ na hinya kana mũtongu gũgũkĩra.

Nyũngũ ya rĩũmba yahota gũtwarana na mbirika ya kĩgera atĩa?

Na githĩ nyũngũ to ĩgũthire mbirika nayo nyũngũ yo nyene ĩgĩkue?

3 Gĩtonga kĩngĩĩka mũndũ ũũru, gĩcookaga gĩkamũruma;

no mũthĩĩni angĩhĩtĩrio, eeragwo atĩ no mũhaka ahere.

4 Gĩtonga gĩgũkũhũthĩra angĩkorwo nĩgĩkũgĩa na uumithio kuuma harĩ we,

no wagĩa na bata, gĩgũtiganĩrie.

5 Angĩkorwo wĩ na indo nĩgĩgũikarania nawe gĩcirĩe gĩciniine biũ gĩtarĩ na tha.

6 Hĩndĩ ĩrĩa kĩ na bata nawe, nĩgĩgũkũheenereria,

na gĩgũthekie wega mũno gĩkũũrie atĩrĩ,

“Nĩ kĩĩ ũbataire?”

7 Gĩgũkũhe irio nginya ũigue ũconokeete.

Kĩarĩĩkia gũkũũrĩa maita meerĩ kana matatũ gĩcooke gĩgũthekerere.

Kĩngĩcooka gĩkuone thuutha ũcio gĩgwĩtua atĩ gĩtikũũĩ gĩkũhĩtũke.

8 Wĩmenyerere ndũkaae kũhĩtithio,

wahota gũkorwo ũrĩ ikenoinĩ ũcooke wone waconorithio o rĩmwe.

9 Ũngĩĩtĩrwo iruga nĩ mũndũ mũnene-rĩ, wĩnyiite,

na nĩarĩgwĩtaga maita maingĩ.

10 Ndũkaae kwĩhatĩrĩria haarĩa mbere ndũkeemenithie,

na ndũgaikare haraaya mũno ndũkaariganĩre.

11 Ndũkaae gwĩtua atĩ nĩmũiganaine na mũnene ũcio,

kana wĩhoke mĩario yothe ĩrĩa araaria,

nĩ amu egũkũgeria na mĩario mĩingĩ,

o na rĩrĩa arathekatheka, nĩgũkũgeria arakũgeria.

12 Mũndũ ũtangĩiga hitho nĩ mũũru mũno;

amu ndagĩona hinya gũkũgũtha kana gũkuohithia.

13 Kwoguo wĩigĩre hitho na wĩmenyerere mũno, amu ũrathiĩ wĩkuuĩire ũgwati.

Waigua maũndũ macio wĩ toro, ũkĩra!

14 Hĩndĩ ĩrĩa yothe ũgũtũũra muoyo,

enda Mwathani na ũmwĩtage akũhonokie.

15 Nyamũ o yothe nĩyendaga nyamũ ĩngĩ ĩrĩa ĩhaanaine nayo,

na mũndũ o naake nĩendaga mũndũ ũrĩa ũngĩ.

16 Nyamũ ciothe i muoyo ciikaranagia kũringana na ũrĩa ihaanaine,

nao andũ maikaranagia na andũ ta o.

17 Atĩrĩĩrĩ, nĩ ndũgũ ĩrĩkũ ĩngĩkorwo ĩrĩ ho gatagatĩ ka ndũrũme na mũthige?

Ũguo noguo kũhaana gatagatĩ ka mũndũ mwĩhia na mũndũ wĩ na ũngai.

18 Nĩ ndũgũ ĩrĩkũ ĩngĩkorwo ĩrĩ ho gatagatĩ ka njũũi na ngui?

Kana nĩ ndũgũ ĩrĩkũ ĩngĩkorwo ĩrĩ ho gatagatĩ ga gĩtonga na mũthĩĩni?

19 O ta ũrĩa nyamũ cia gĩthaka iria ciĩtagwo ndigiri cia gĩthaka arĩ cio irio cia mũrũũthi,

noguo athĩĩni arĩ o irio cia itonga.

20 O ta ũrĩa andũ etĩĩi maconoraga andũ arĩa enyiihia,

noguo itonga iconoraga athĩĩni.

21 Gĩtonga kĩngĩtũgũũga-rĩ, kĩnyiitagĩrĩrwo nĩ araata aakĩo,

no mũthĩĩni angĩgwa, o na araata aake nĩmamũthinĩkanagia.

22 Gĩtonga kĩngĩĩhia, arĩa megũgĩteithĩrĩria nĩ aingĩ,

na kĩngĩaria ciugo njũru, ikagerio kwagĩrio.

Mũthĩĩni angĩtenderũka, amenagĩrĩrio nĩ andũ oothe,

na angĩaria mĩario o na ĩkorwo ĩ mĩega atĩa gũtirĩ mũndũ ũngĩmũthikĩrĩria.

23 Rĩrĩa gĩtonga gĩkwaria, andũ oothe makoragwo makirĩĩte ki,

na makagaathĩrĩria mĩario yakĩo mũno.

Mũthĩĩni akĩaria mooranagia atĩrĩ, “Ũũrĩa naake nũũ?”

Na angĩhagũka, o na nĩmamũthinĩkanagia.

24 Ti ũũru kũgĩa na ũtonga na njĩra ĩtarĩ ya meehia,

na ũthĩĩni nĩ mũũru

maithoinĩ ma andũ arĩa matarĩ na ũngai.

25 Maũndũ marĩa me thĩinĩ wa ngoro ya mũndũ nĩ mo matũmaga gĩthiithi gĩake gĩtuke kana gĩthere.

26 Ngoro ya mũndũ ĩ na gĩkeno yonanagio nĩ gĩthiithi gĩake,

no gũthondeka thimo nĩkwendaga mũndũ eciirie mũno.