Kũrera ciana

1 Mũndũ ũrĩa wendeete mwana nĩamũhũũraga kaingĩ

nĩguo agaacooka akenio nĩ we tondũ wa ũrĩa agaatuĩka matukũ ma thuutha.

2 Aruta mwana mĩtugo, matukũinĩ ma thuutha nĩonaga uumithio kuuma kũrĩ we,

na nĩetĩĩaga nĩ ũndũ wake harĩ andũ arĩa mooyaine.

3 Mũndũ ũrĩa wonagĩrĩria mwana nĩatũmaga thũ ciake ciigue ũiru,

na nĩegoocaga naake rĩrĩa e hamwe na araata aake.

4 Ithe wa mũndũ no akue no akorwo ndakuĩte,

tondũ nĩatigĩĩte mũndũ ũmũhaana.

5 Rĩrĩa aarĩ muoyo aamuonaga na agakena,

na agĩkua ndakoragwo na kĩeha.

6 Nĩatigĩĩte mũndũ wa kũmũũrĩria kũrĩ thũ ciake,

na wa gũcookia guoko kũrĩ araata aake.

7 Mũndũ ũrĩa ũtũrĩkagĩa mwana agaacooka kwĩyoha ironda,

na hingo ciothe angĩigua mbu nĩatuĩkaga nda.

8 Mbarathi ĩrĩa ĩtahoorereetio nĩkoragwo ĩ ngũrũki,

na noguo mwana ũrĩa ũtarutĩĩtwo mĩtugo ahaana.

9 Ũngĩtũũnia mwana nĩ agaagũconora;

ũngĩthaakia mwana nĩagaagwĩkĩra kĩeha.

10 Thekia mwana rĩu, no thuutha nĩagaakũrĩria,

atũme ũhagaranie magego na wĩrire.

11 E mwĩthĩ ndũkaareke eeke ũrĩa ekwenda,

na ahĩtia ndũkaamũkirĩre.

12 E mwĩthĩ reke akorwo enyiihĩĩtie,

na ũmũhũũrage e mũnyiinyi,

nĩguo ndakaae gũtũrĩka aage gũgwathĩkĩra,

na agĩtũmage ngoro yaku ĩthĩĩnĩkage.

13 Kĩrute mwana waku mĩtugo na ũmũheage wĩra wa kũruta

nĩguo ndakaae gũtuĩka wagũgũconorithia.

Ũgima wa mwĩrĩ

14 Kaba gũthĩĩna na ũkorwo wĩ na hinya na ũgima wa mwĩrĩ,

gũkĩra gũtonga na ũkorwo ũtarĩ na ũgima wa mwĩrĩ.

15 Gũkorwo na ũgima wa mwĩrĩ,

na gũkorwo ũiganĩire irĩ bata gũkĩra thahabu,

na mwĩrĩ wĩ na hinya nĩũkĩrĩĩte ũtonga wothe.

16 Gũtirĩ ũtonga ũkĩrĩĩte ũgima wa mwĩrĩ,

na gũtirĩ gĩkeno gĩkĩrĩĩte gĩkeno kĩa ngoro.

17 Kaba gũkua gũkĩra gũtũũra mũtũũrĩre wa thĩĩna;

gĩkuũ nĩ kĩega gũkĩra mũrimũ ũtakaahonwo.

18 Irio njega inengereetwo mũndũ mũrũaru ũtangĩhota kũrĩa itirĩ bata,

itariĩ o ta irio cia igongoona ciigĩrĩirwo mbĩĩrĩra igũrũ.

19 Atĩrĩĩrĩ, igongoona rĩa irio kũrĩ mũhianano nĩ rĩa bata ũrĩkũ?

Ndũngĩcirĩa, o na ndũngĩigua mũnungo wacio.

Ũguo noguo mũndũ ũrĩa Mwathani eekĩrĩĩte ruwoinĩ atariĩ.

20 Acũũthagĩrĩria irio agacaaya,

o ta ũrĩa mũndũ mũrũme mũhakũre acaayaga ahĩmbĩirie mũirĩĩtu.

Gĩkeno na kĩeha

21 Ndũkaae gwĩtwarĩrĩria kĩehainĩ,

na ndũkaae kwĩreeherere ruwo ũkĩmenyaga.

22 Gĩkeno kĩa ngoro ya mũndũ nĩguo muoyo wake,

na mũndũ gũkorwo e mũkenu matukũ maake nĩmoongererekaga.

23 Gĩkenie muoyo waku na ũhe ngoro yaku ũũmĩrĩru;

kĩeha kĩeherie biũ kuuma harĩ we,

amu kĩananiina andũ aingĩ,

na gĩtikoragwo kĩrĩ na uumithio.

24 Ũiru na maraakara nĩinyiihanyiihagia matukũ ma muoyo wa mũndũ,

na mũndũ gweterera mũndũ e na guoya nĩgũtũmaga akũre narua.

25 Mũndũ mũkeni na wĩ ngoro njega nĩakoragwo na wendo wa kũrĩa irio,

na nĩaiguaga irio irĩ njega.