Athigaani
1 MWATHANI akĩĩra Musa atĩrĩ,
2 “Thuura mũtongoria ũmwe kuuma harĩ o mũhĩrĩga, ũmatũme magathigaane bũrũri wa Kanaani ũrĩa ngũhe andũ a Isiraeli.”
3-15 Musa nĩagĩathĩkĩire ũguo eerirwo nĩ MWATHANI, agĩgĩtũma atongoria kuuma werũinĩ wa Parani ta ũũ:
Reubeni Shamua mũrũ wa Zakuru
Simeoni Shafatu mũrũ wa Hori
Juda Kalebu mũrũ wa Jefune
Isakaru Igali mũrũ wa Josefu
Efiraimu Hoshea mũrũ wa Nuni
Benjamini Paliti mũrũ wa Rafu
Zebuluni Gadieli mũrũ wa Sodi
Manase Gadi mũrũ wa Susi
Dani Amieli mũrũ wa Gemali
Asheri Sethuri mũrũ wa Mikaeli
Nafutali Nahibi mũrũ wa Vofisi
Gadi Geueli mũrũ wa Maki
16 Acio nĩ o athigaani arĩa Musa aatũmire magathigaane bũrũri wa Kanaani. Nĩagarũrire rĩĩtwa rĩa Hoshea mũrũ wa Nuni akĩmũtua Joshua.
17 Musa akĩmatũma nĩameerire atĩrĩ, “Wona mwoima haaha, mwambate na rũgongo mũtoonye werũinĩ wĩ mwena wa na kĩanda wa bũrũri wa Kanaani, mũcooke mwambate nginya bũrũri ũrĩa wĩ irĩma.
18 Mũrore bũrũri ũcio ũrĩa ũtariĩ, mũone kana andũ aakuo me na hinya kana matirĩ, na mũrore kana nĩ aingĩ kana ti aingĩ.
19 Ningĩ mũrore kana bũrũri ũcio matũũraga nĩ mwega kana ti mwega, na mũrore kana matũũra marĩa matũũraga nĩmairigĩre na thingo cia hinya kana timairigĩre,
20 Ningĩ mũrore kana tĩĩri nĩ mũnoru kana ti mũnoru, na mũrore kana kwĩ mĩtitũ kana gũtirĩ. Na rĩĩrĩ, mũone atĩ nĩmwareehe matunda mamwe ma marĩa makũraga kuo.” (Ihinda rĩu rĩarĩ kĩmera kĩrĩa thabibũ ciambagĩrĩria kwĩrua.)
21 Nĩmaakĩambatire na rũgongo magĩthigaana bũrũri kuuma werũinĩ wa Zini ũrĩa wĩ mwena wa na kĩanda wa bũrũri ũcio nginya Rehobu, hakuhĩ na itoonyero rĩa Hamathu mwena wa rũgongo.
22 Maambire magĩthiĩ werũinĩ wĩ mwena wa na kĩanda wa bũrũri ũcio magĩkinya Heburoni, kũrĩa mbarĩ cia Ahimani, Sheshai na Talimai, iria ciarĩ njiarwa cia rũruka rwa imũndũ nene cietagwo Anaki ciatũũraga. (Itũũra rĩa Heburoni rĩakirwo mĩaka mũgwanja mbere ya itũũra rĩa Zoani rĩrĩa rĩrĩ Misiri.)
23 Nao magĩkinya gĩtuambainĩ kĩa Eshikoli, magĩtua rũhonge rwa mũthabibũ rwarĩ na thabibũ kĩmanjĩka kĩmwe, iria andũ eerĩ maacuuhirie na mũtĩ magĩcikuuanĩra nĩ ũndũ wa kũritũha. O na no maakuuire makongomanga mamwe o hamwe na ngũyũ.
24 (Kũndũ kũu nĩmaagũtuire gĩtuamba kĩa Eshikolinĩ ũndũ wa kĩmanjĩka gĩa thabibũ kĩrĩa andũ a Isiraeli maatũire kuo.)
25 Andũ acio marĩĩkia gũthigaana bũrũri ũcio mĩthenya mĩrongo ĩna, magĩcooka
26 kũrĩ Musa, Harũni, na andũ oothe a Isiraeli arĩa maarĩ Kadeshi werũinĩ wa Parani. Magĩkĩmeera ũrĩa mooneete, na makĩmoonia matunda marĩa maareeheete.
27 Makĩĩra Musa atĩrĩ, “Nĩtwathigaanire bũrũri ũrĩa watũtũmire tũgathigaane, na bũrũri ũcio nĩ mwega na mũnoru, na maya nĩmo matunda maguo.
28 No rĩĩrĩ, andũ arĩa matũũraga kuo me na hinya, na matũũra maao nĩ manene mũno na makairigĩrwo wega na thingo cia hinya. O na nĩtũroonire njiarwa cia imũndũ iria nene kuo.
29 Na rĩĩrĩ, andũ arĩa meetagwo Aamaleki maikaraga werũinĩ wa mwena wa na kĩanda wa bũrũri ũcio, nao Ahiti, Ajebusi na Aamori maikaraga bũrũri ũrĩa ũrĩ irĩma, nao Akanaani maikaraga hũgũrũrũinĩ cia iria rĩa Mediteraneani o na hũgũrũrũinĩ cia rũũĩ rwa Jorodani.”
30 No rĩĩrĩ, Kalebu agĩkiria andũ arĩa maatetagia Musa akiuga atĩrĩ, “Nĩtũmookĩrĩreei tũmatuunye bũrũri ũcio, nĩ ũndũ twĩ na hinya mũiganu wa kũmahoota.”
31 No andũ arĩa maathiĩte na Kalebu makiuga atĩrĩ, “Aaca, tũtirĩ na hinya mũiganu wa kũmatharĩkĩra; andũ arĩa me kũu me na hinya gũtũkĩra.”
32 Kwoguo magĩkĩhe Aisiraeli oothe ũhoro wa maheeni ũkoniĩ bũrũri ũcio maathiĩte gũthigaana makĩmeera atĩrĩ, “Bũrũri ũcio o na ndũkũraga irio cia kũigana andũ arĩa matũũraga kuo. Andũ arĩa tũroonire kuo nĩ araihu mũno,
33 o na nĩtũroonire imũndũ nene kuo, iria irĩ njiarwa cia Anaki. Tũrĩ harĩ cio tũreyonaga tũrĩ anyiinyi o ta ndaahi, na noguo o nacio iratuonaga tũtariĩ.”