Thigũkũ iria nyamũre
1 Ningĩ MWATHANI akĩĩra Musa atĩrĩ,
2 “Arĩria andũ a Isiraeli ũmeere atĩrĩ: Ici nĩcio thigũkũ cia MWATHANI iria mũrĩũnganaga gũthaathaiya.
Thabatũ
3 “Atĩrĩĩrĩ, mũrĩrutaga wĩra mĩthenya ĩtandatũ, no mũthenya wa mũgwanja nĩ Thabatũ rĩrĩa mũrĩhuurũkaga. Mũthenya ũcio-rĩ, nĩguo mũrĩũnganaga gũthaathaiya, gũtirĩ wĩra mũrĩrutaga o na atĩa. Mũthenya ũcio ũrĩkoragwo ũrĩ Thabatũ yamũrĩirwo MWATHANI o harĩa hoothe mũrĩkoragwo mũgĩtũũra.
4 “Thigũkũ ici irũmĩrĩire nĩcio mũrĩũnganaga gũthaathaiya, o thigũkũ ihinda rĩrĩa yathĩrĩirwo.
Thigũkũ ya Bathaka na ya Mĩgate Ĩtarĩ Mĩĩkĩre Ndaawa ya Kũimbia
5 “Atĩrĩĩrĩ, thigũkũ ya Bathaka, ĩrĩa ĩkũngũyagĩrwo nĩ ũndũ wa kũhe MWATHANI gĩtĩĩo ĩrĩambagĩrĩria riũa rĩathũa, mũthenya wa ikũmi na ĩna wa mweri wa mbere.
6 Mũthenya wa ikũmi na ĩtaano wa mweri ũcio nĩguo Thigũkũ ya Mĩgate Ĩtarĩ Mĩĩkĩre Ndaawa ya kũimbia ĩrĩambagĩrĩria, na ĩrĩniinaga mĩthenya mũgwanja. Hĩndĩ ĩyo yothe mũrĩrĩaga o mĩgate ĩtarĩ mĩĩkĩre ndaawa ya kũimbia.
7 Mũthenya wa mbere wa mĩthenya ĩyo nĩguo mũrĩũnganaga gũthaathaiya, na gũtirĩ wĩra mũrĩrutaga.
8 Mũrĩrutagĩra MWATHANI magongoona ma gũcinwo mĩthenya mũgwanja. Mũthenya wa mũgwanja nĩguo mũrĩũnganaga o rĩngĩ gũthaathaiya, na gũtirĩ wĩra mũrĩrutaga.”
9 Ningĩ MWATHANI akĩĩra Musa atĩrĩ,
10 “Arĩria andũ a Isiraeli ũmeere atĩrĩ: Rĩrĩa mũgaakinya bũrũriinĩ ũrĩa MWATHANI eerekeire kũmũhe na mũgethe ngano yanyu-rĩ, mũgaatwarĩra mũthĩnjĩri Ngai gĩtĩĩa kĩa mbere kĩa ngano ĩyo.
11 Naake mũthĩnjĩri Ngai arutĩre MWATHANI gĩtĩĩa kĩu kĩrĩ kĩheeo kĩa mwanya, nĩguo mwĩtĩkĩrĩke. Ageeka ũguo mũthenya ũrĩa ũrũmĩrĩire Thabatũ.
12 Mũthenya o ro ũcio mũkaaruta kĩheeo kĩu kĩa ngano, nĩmũkaarutĩra MWATHANI igongoona rĩa njino rĩa gatũrũme ka mwaka ũmwe gatarĩ na kaũũgũ.
13 Mũgaakarutanĩria na kiro igĩrĩ cia mũtu ũtukanĩĩtio na maguta ma mĩtamaiyũ ũrĩ igongoona rĩa irio. Mũtararĩko wa igongoona rĩu nĩũkenagia MWATHANI. O na ningĩ nĩmũgaakarutanĩria na kĩheeo kĩa ndibei kĩa rita ĩmwe.
14 Mũtikaanarĩe ngano ĩyo ya mũgethano ĩrĩ njĩthĩ, ĩkarangĩĩtwo kana ĩthĩĩtwo ĩgakandwo mĩgate, o nginya rĩrĩa mũgaakorwo mũrutĩire Ngai wanyu igongoona rĩu. Watho ũyũ no nginya njiarwa cianyu ciothe ciũrũmagĩrĩre hingo ciothe.
Thigũkũ ya Magetha
15 “Na rĩĩrĩ, kuuma mũthenya ũcio ũrũmĩrĩire Thabatũ ũrĩa mũgaatwarĩra MWATHANI gĩtĩĩa kĩu kĩa mbere kĩa ngano kĩrĩ kĩheeo kĩa mwanya, mũgaatara ciumia nginya ihinge mũgwanja.
16 Mũthenya wa mĩrongo ĩtaano, ũrĩa ũgaakorwo ũrũmĩrĩire Thabatũ ya mũgwanja, mũgaatwarĩra MWATHANI kĩheeo kĩngĩ kĩa ngano ya mũgethano.
17 O mũciĩ ũkaareehe mĩgate ĩĩrĩ ũmĩrutĩre MWATHANI ĩrĩ kĩheeo kĩa mwanya. O mũgate ũgaakorwo ũthondekeetwo na kiro igĩrĩ cia mũtu ũkandĩĩtwo ũrĩ na ndaawa ya kũimbia, nayo ĩkĩrutĩrwo MWATHANI ĩrĩ kĩheeo kĩa mbere kĩa ngano ya mũgethano.
18 Ningĩ nĩmũkaareehanĩria mĩgate ĩyo na tũtũrũme mũgwanja twa mwaka ũmwe, ndeegwa ĩmwe, na ndũrũme igĩrĩ. Nyamũ o yothe ya icio ndĩkaanakorwo na kaũũgũ. Nyamũ icio ikaarutĩrwo MWATHANI irĩ igongoona rĩa njino, hamwe na igongoona rĩa mũtu na igongoona rĩa ndibei. Mũtararĩko wa igongoona rĩu nĩũkenagia MWATHANI.
19 O na ningĩ nĩmũkaaruta thenge ĩmwe ya igongoona rĩa meehia na tũtũrũme twĩrĩ twa mwaka ũmwe twa igongoona rĩa thaayũ.
20 Naake mũthĩnjĩri Ngai arute mĩgate ĩyo hamwe na tũtũrũme tũu twĩrĩ irĩ kĩheeo kĩa mwanya kĩrutĩirwo MWATHANI kĩrĩa kĩrigagia na athĩnjĩri Ngai. Iheeo icio nĩ theru.
21 Mũthenya ũcio mũkoongana gũthaathaiya mũtikaanarute wĩra o na ũrĩkũ. Njiarwa cianyu, o harĩa hoothe igaakoragwo igĩtũũra, no nginya ikaarũmagĩrĩra watho ũyũ hingo ciothe.
22 “Atĩrĩĩrĩ, rĩrĩa mũrĩkoragwo mũkĩgetha irio mĩgũndainĩ yanyu-rĩ, mũtikaagethage o nginya ndeereinĩ ciayo, kana mũcookage na thuutha kũhaara irio iria mũtigĩĩtie mũkĩgetha; citigageei nĩ ũndũ wa athĩĩni na ageni. Niĩ nĩ niĩ MWATHANI Ngai wanyu.”
Thigũkũ ya Mwaka Mwerũ
23 Ningĩ MWATHANI akĩĩra Musa atĩrĩ,
24 “Arĩria andũ a Isiraeli ũmeere atĩrĩ: Mũthenya wa mbere wa mweri wa mũgwanja ũrĩkoragwo ũrĩ wa kũhuurũkwo, na nĩguo mũrĩũnganaga gũthaathaiya rĩrĩa tũrumbeeta twahuuhwo.
25 Gũtirĩ wĩra mũrĩrutaga, na nĩmũrĩrutagĩra MWATHANI igongoona rĩa njino.”
Mũthenya wa Kũhoroherio Meehia
26 Ningĩ MWATHANI akĩĩra Musa atĩrĩ,
27 “Mũthenya wa ikũmi wa mweri ũcio wa mũgwanja nĩguo andũ marĩhorohagĩrio meehia maao. Mũthenya ũcio-rĩ, mũrĩĩhingaga kũrĩa na kũnyua, mũkoongana gũthaathaiya na mũkarutĩra MWATHANI igongoona rĩa njino.
28 Na rĩĩrĩ, mũtirĩrutaga wĩra mũthenya ũcio, tondũ nĩguo ũrĩkoragwo wĩ mũthenya wa kũhoroheria meehia.
29 Mũndũ o wothe ũrĩa ũtarĩĩhingaga kũrĩa na kũnyua mũthenya ũcio no kũingatwo arĩingatagwo kuuma harĩ mũingĩ wa Isiraeli.
30 Naake mũndũ o wothe ũrĩa ũrĩrutaga wĩra mũthenya ũcio nĩkũmwananga ndĩmwanangaga ngamũthengia kuuma harĩ mũingĩ wa Isiraeli.
31 Mũtikaarutage wĩra o na atĩa, watho ũyũ ũrĩrũmagĩrĩrwo nĩ njiarwa cianyu ciothe, hingo ciothe o harĩa hoothe irĩkoragwo irĩ.
32 Mũrĩambagĩrĩria gũtĩĩa mũthenya ũcio riũa rĩathũa mũthenya wa kenda wa mweri ũcio, nginya mũthenya wa ikũmi riũa rĩgĩthũa. Ũrĩkoragwo wĩ mũthenya wa kũhuurũkwo, na nĩmũrĩĩhingaga kũrĩa na kũnyua.”
Thigũkũ ya Ithũnũ
33 Ningĩ MWATHANI akĩĩra Musa atĩrĩ,
34 “Arĩria andũ a Isiraeli ũmeere atĩrĩ: Thigũkũ ya Ithũnũ ĩrĩambagĩrĩria mũthenya wa ikũmi na ĩtaano wa mweri wa mũgwanja ĩkaniina mĩthenya mũgwanja.
35 Mũthenya wa mbere wa mĩthenya ĩyo nĩguo mũrĩũnganaga gũthaathaiya na gũtirĩ wĩra mũrĩrutaga.
36 Mũrĩrutagĩra MWATHANI igongoona rĩa njino mũthenya o mũthenya o nginya rĩrĩa mĩthenya ĩyo mũgwanja ĩgaathira. Naguo mũthenya wa kanaana mũkoongana o rĩngĩ gũthaathaiya na mũkarutĩra MWATHANI igongoona rĩa njino. Mũthenya ũcio ũrĩkoragwo ũrĩ wa gũthaathaiya, na gũtirĩ wĩra mũrĩrutaga.”
37 (Icio nĩcio thigũkũ iria nyamũre cia MWATHANI iria mũrĩkũngũyagĩra na ũndũ wa kũũnganaga hamwe gũthaathaiya na kũrutaga magongoona ma irio, magongoona ma njino, magongoona ma mũtu, magongoona, na magongoona ma ndibei, mũthenya o mũthenya o ta ũrĩa gwathanĩĩtwo.
38 Thigũkũ icio mũrĩcikũngũyagĩra hamwe na Thabatũ iria mũkoragwo nacio, namo magongoona macio mũrĩmarutanagĩria hamwe na iheeo iria mũrutaga, magongoona maanyu ma kũhingia mĩĩhĩtwa ĩrĩa mwĩhĩtĩĩte, o na magongoona maanyu marĩa mũrutagĩra MWATHANI na kwĩyendera.)
39 “Kũngũyagĩraai thigũkũ ya Ithũnũ mĩthenya mũgwanja, kwambĩrĩria mũthenya wa ikũmi na ĩtaano wa mweri wa mũgwanja mwarĩĩkia kũgetha irio mĩgũndainĩ yanyu. Mũthenya wa mbere ũrĩkoragwo ũrĩ mũthenya wa mwanya wa kũhuurũka.
40 Mũthenya ũcio wa mbere mũrĩoyaga matunda marĩa meega mũno mũtuĩte kuuma mĩtundainĩ yanyu, mathĩgĩ ma mĩkĩndũ, honge cia mĩtĩ ĩrĩa ĩrĩ mathangũ maingĩ, o na cia mĩtĩ ĩrĩa ĩmeraga ndeereinĩ cia rũũĩ mũkaambĩrĩria thigũkũ nyamũre ya MWATHANI Ngai wanyu.
41 Mũrĩmĩkũngũyagĩra mĩthenya mũgwanja. Watho ũyũ no nginya njiarwa cianyu ciothe ciũrũmagĩrĩre hingo ciothe.
42 Mũrĩtũũraga ithũnũinĩ mĩthenya mũgwanja. Arĩa oothe matũũraga bũrũriinĩ wa Isiraeli marĩikaraga ithũnũinĩ,
43 nĩguo njiarwa cianyu imenyage atĩ nĩndatũmire andũ a Isiraeli matũũre ithũnũinĩ rĩrĩa ndamarutire bũrũriinĩ wa Misiri. Niĩ nĩ niĩ MWATHANI Ngai wanyu.”
44 Ũguo nĩguo Musa aamenyithirie andũ a Isiraeli mawatho marĩa marĩrũmagĩrĩra rĩrĩa marakũngũĩra thigũkũ iria nyamũre cia MWATHANI.