Tobia kũnyiita thamaki
1 Kwoguo Tobia na mũraika ũcio makĩnyiita rũgendo maroreete Media, nao magĩthiĩ hamwe na ngui ya Tobia. Magĩthiĩ o nginya riũa rĩgĩthũa, makĩamba hema hakuhĩ na rũũĩ rwa Tigiri.
2 Na rĩĩrĩ, Tobia aathiĩte gwĩthamba magũrũ rũũĩinĩ hĩndĩ ĩrĩa thamaki nene yarũũgire ikiuma maaĩinĩ o rĩmwe, ĩkĩgeria kũmeria kũgũrũ gwake, naake Tobia agĩkayũrũrũka.
3 Naake mũraika ũcio akĩmwĩra atĩrĩ, “Nyiita thamaki ĩyo! Ndũkaareke yũre!”
Tobia agĩkĩmĩnyiita, akĩmĩguucia kinya hũgũrũrũinĩ.
4 Ningĩ mũraika akĩmwĩra atĩrĩ, “Mĩatũranie ũrute ngoro, ini, na nyongo ũciige wega. Nyama icio ingĩ cia nda cite. Nyongo, ngoro na ini no ihũthĩrwo ta ndaawa.”
5 Tobia agĩĩka o ũrĩa mũraika aamwĩrire. Agĩcooka akĩruga thamaki ĩyo akĩrĩa gĩcunjĩ na kĩrĩa kĩngĩ agĩgĩĩkĩra cumbĩ agĩgĩkuua.
Ningĩ eerĩ magĩthiĩ na mbere na rũgendo o nginya magĩkuhĩrĩria Media.
6 Tobia akĩũria mũraika ũcio atĩrĩ, “Azaria, mũrũ wa maitũ, ini, ngoro, na nyongo cia thamaki ĩyo-rĩ, ingĩhonia mũrimũ ũrĩkũ?”
7 Naake mũraika ũcio akĩmũcookeria atĩrĩ, “Ha ũhoro wa ngoro na ini rĩu-rĩ, mũndũ o na ũrĩkũ angĩthĩĩnio nĩ ngoma, atoogererio ndoogo ya indo icio, mũndũ mũrũme ũcio kana mũtumia ũcio ndagaathĩĩnio rĩngĩ.
8 Naho ha ũhoro wa nyongo-rĩ, ũngĩmĩhaka mũndũ wĩ na njereeri maitho no ahone.”
Marĩ njĩrainĩ gũthiĩ Ekibatana
9 Rĩrĩa maakinyire Media na maakuhĩrĩria itũũra rĩa Ekibatana,
10 Rafaili akiuga atĩrĩ, “Mũraata wakwa Tobia,” naake Tobia agĩcookia atĩrĩ, “Ũũĩ!” Rafaili akĩmwĩra atĩrĩ, “Hwaĩinĩ ũyũ tũgũikara kwa mũndũ wa nyũmba yanyu wĩtagwo Ragueli. Arĩ mwana ũmwe tu wa mũirĩĩtu wĩtagwo Sara,
11 na tondũ wee nĩ we mũkuhanĩrĩirie mũno, nĩ we wagĩrĩirwo nĩkũmũhikia. O na ningĩ nĩ we wagĩrĩirwo nĩkũgaya indo cia ithe ciothe.
12 Mũirĩĩtu ũcio nĩ mũũgĩ na nĩ mũũmĩrĩru, o na nĩ mũthaka; ningĩ ithe nĩ mũndũ mwega. Hwaĩinĩ nĩngwaria na ithe ũhoro wa njũũrio, na nĩegwĩtĩkĩra gũkũnengera mũirĩĩtu ũcio atuĩke mũtumia waku. Na rĩĩrĩ, wona twainũka kuuma itũũra rĩa Ragesi, nĩtũgaakũngũĩra ũhiki. Amu nĩnjũũĩ atĩ kũringana na Watho wa Musa, Ragueli ndangĩneana mũirĩĩtu ũcio kũrĩ mũndũ mũrũme ũngĩ. Angĩĩka ũguo nĩekwĩreehithĩria iherithia rĩa gĩkuũ, nĩ gũkorwo wee nĩ we wagĩrĩirwo nĩkũmũgaya no ti mũndũ ũngĩ o wothe. Tũkiuma Ragesi nĩtũkaamuoya tũinũke naake.”
13 Naake Tobia akĩĩra Rafaili atĩrĩ, “Mũrũ wa maitũ Azaria, nĩndĩkĩĩtie kũigua ũhoro wa athuuri mũgwanja arĩa Sara akoreetwo nao, na ũrĩa o mũthuuri aakuire hwaĩinĩ wa ũhiki o na atahaicĩĩte ũrĩrĩ.
14 Rĩu-rĩ, niĩ ndĩ mwana wa mũũmwe wa baaba, na nĩndĩretigĩra atĩ hiihi ingĩthiĩ kũrĩ we, nĩngũkua o ta ũrĩa acio maarĩ mbere yakwa meekire, amu kũrĩ na ngoma yendeete mũirĩĩtu ũcio, na ndĩĩkaga mũndũ ũngĩ ũũru tiga o ũrĩa wamũthengerera. Kwoguo nĩngwĩtigĩra atĩ ndahota gũkua, ndũme baaba na maitũ makue nĩ kĩeha nĩ ũndũ wakwa. Matirĩ na mwana ũngĩ wa kũmathika.”
15 No mũraika ũcio akĩmũcookeria atĩrĩ, “Kaĩ ũriganĩirwo nĩ mataaro ma thooguo? Aakwĩrire ũhikie mũtumia kuuma rũũrĩrĩ rwanyu. Kwoguo gĩthikĩrĩrie wega ũrĩa ngũkwĩra. Tiga gwĩtigĩra ngoma ĩyo; mũhikie! Amu nĩnjũũĩ atĩ hwaĩinĩ Ragueli nĩegwĩtĩkĩria Sara akũhikĩre.
16 Wona waingĩra nyũmba ya toro, woe ngoro ya thamaki ĩrĩa na ini ũciĩkĩre ũbaaniinĩ ũrakana,
17 nĩ geetha mũtararĩko wacio ũiyũre nyũmba ĩyo yothe. Rĩrĩa ngoma ĩyo ĩrĩigua mũnungo ũcio, nĩrĩthiĩ na ndĩgaacooka gũkuhĩrĩria Sara rĩngĩ. No mbere ya gũkoma naake, no mũhaka inyuerĩ mũũkĩre mũhooe Mwathani amũiguĩre tha na amũgitĩre. Tiga gwĩtigĩra, amu Sara aamũrĩirwo wee kuuma o tene. Nĩũkũmũhonokia kuuma harĩ ngoma ĩyo, na nĩegũthiĩ nawe nginya mũciĩ kwanyu. Ningĩ mũrĩ na Sara nĩmũkũgĩa na ciana nyingĩ na nĩmũgaacienda mũno. Kwoguo, tiga kũmaka.”
Tobia agĩgĩthikĩrĩria wega mũno ũrĩa Rafaili oigaga. Nĩamenyaga atĩ aarĩ wa nyũmba yao mwenainĩ wa ithe. Agĩkĩambĩrĩria kwenda Sara na akĩĩrirĩria mũno kũmũhikia.