Mataaro ma Tobiti ma mũthia
1-2 Rĩrĩa Tobiti aatuĩkire gĩtumuumu aarĩ wa mĩaka mĩrongo ĩtandatũ na ĩĩrĩ, no thuutha wa kũhota gũcooka kuona, nĩatũũrire ũtũũro mũkinyanĩru biũ. Nĩathiire o na mbere kũhe athĩĩni na ũtaana, o na agĩthiĩ na mbere kũgooca Ngai na kũheana ũhoro wa ũnene wake. Tobiti aakuire na thaayũ arĩ na ũkũrũ wa mĩaka igana na ikũmi na ĩĩrĩ, na agĩthikwo na gĩtĩĩo kũu Nineve.
3 Ataanakua nĩatũmanĩire mũũriũ Tobia akĩmwĩra atĩrĩ,
4 “Mwana wakwa, oya ciana ciaku o rĩmwe mũthiĩ Media. Amu nĩnjĩtĩkĩĩtie atĩ itua rĩa Ngai rĩrĩa mũnabii Nahumu aanĩrĩire igũrũ wa Nineve rĩ hakuhĩ kũhinga. Maũndũ moothe meerĩĩtwo Aisiraeli nĩ anabii a Ngai igũrũ rĩa Asiria na Nineve nĩmekũhinga. Ihinda rĩrĩa rĩagĩrĩru rĩakinya moothe nĩmekũhinga. Wee ũkoona wega ũrĩ Media gũkĩra ũrĩ Asiria kana Babiloni. Niĩ mwene nĩnjũũĩ na nĩnjĩtĩkĩĩtie atĩ ũndũ o wothe Ngai oigĩĩte no mũhaka ũhinge. Ũguo nĩguo gũgaatuĩka na gũtirĩ mũgambo o na ũmwe wa ũrathi ũkaaga kũhinga.
“Andũ a rũũrĩrĩ rwitũ arĩa matũũraga Isiraeli nĩmegũtahwo na mathaamio marutwo bũrũri ũcio mwega. Bũrũri wothe wa Isiraeli nĩũgũtuĩka werũ, na Samaria na Jerusalemu ituĩke maganjo. Andũ aitũ nĩmekũhurunjũka thĩ yothe moime bũrũri ũcio mwega, na Jerusalemu ĩtigwo ũtheri. Hekaarũ ya Ngai nĩgũcinwo na ĩkorwo yanangĩkĩĩte kwa ihinda.
5 No Ngai nĩakaiguĩra andũ aake tha rĩngĩ na nĩakaamacookia bũrũriinĩ wa Isiraeli. Nao nĩmagaaka Hekaarũ ya Ngai rĩngĩ, o na gũtuĩka ndĩgaakorwo ĩrĩ thaka ta ĩyo ya mbere, nginya hĩndĩ ĩrĩa mahinda marĩa maagĩrĩire magaakinya. Na hĩndĩ ĩrĩa mahinda macio magaakinya andũ oothe a Isiraeli nĩmagaacooka kuuma ithaamĩrio, na nĩmagaaka itũũra rĩa Jerusalemu rĩngĩ rĩrĩ na ũthaka warĩo wothe ta tene. Nĩmagaaka Hekaarũ ya Ngai rĩngĩ thĩinĩ wa Jerusalemu o ta ũrĩa anabii a Isiraeli maarathĩĩte.
6 “Nacio ndũũrĩrĩ ciothe thĩinĩ wa thĩ nĩigaacookerera Ngai; imũthaathayagie arĩ o we Ngai wa ma, na itigane na mĩhianano ĩrĩa yacierekeirie gũthaathayainĩ kũu kwa maheeni.
7 Ndũũrĩrĩ cia thĩ nĩikaagooca Ngai wa tene na tene na njĩra ya gwĩka ũrĩa we eendaga.
“Hĩndĩ ĩyo Ngai nĩakaahonokia andũ oothe a Isiraeli arĩa ehokeku harĩ we. Nĩakaamareehe hamwe Jerusalemu, na areke meenyiitĩre bũrũri wa Aburahamu matũũre kuo na thaayũ nginya tene. Arĩa oothe meendeete Ngai na ngoro ciao o hamwe na mĩoyo yao nĩmagaakena, no eehia oothe na andũ ooru nĩmakeeherio kuuma thĩ.
8 “Rĩu ciana ciakwa, rũmĩrĩraai mataaro maakwa. Thaathayagiai Ngai mũtarĩ na ũhinga na mwĩkage ũrĩa ũmũkenagia.
9 Rutagaai ciana cianyu gwĩkaga ũrĩa kwagĩrĩire. Cirutageei atĩ no mũhaka citeithagĩrĩrie athĩĩni na hingo ciothe iririkanage kũgooca Ngai hatarĩ ũhinga.
10 “Tobia, mwana wakwa, uma Nineve rĩu, ndũkaae gũikara gũũkũ. Wona warĩĩkia gũthika maitũguo kũrigania na niĩ uumagare, ndũkaae gũikara ũtukũ ũngĩ thĩinĩ wa itũũra. Rĩĩrĩ nĩ itũũra rĩaganu na rĩiyũire ũmaraaya, na andũ aakuo matiiguaga thoni. Ririkana ũrĩa Nadabu eekire Ahikaru maamawe ũrĩa wamũrerire. Aageririe kũmũũraga agĩtũma athiĩ akeehithe munguinĩ. No Ahikaru nĩahonokirio, naake Ngai agĩikia Nadabu ndumainĩ ĩrĩa ya tene na tene nĩ ũndũ wa ũguo eekĩĩte. Ahikaru nĩahonokire kuuma mũtegoinĩ wa gĩkuũ ũrĩa Nadabu aamũtegeire nĩ ũndũ nĩaheaga athĩĩni na ũtaana. No Nadabu akĩgũa mũtegoinĩ ũcio ũkĩmũniina.
11 Kwoguo ciana ciakwa, nĩmũgũkĩona ũrĩa arĩa matangĩkagĩra arĩa angĩ meekagwo, na ũrĩa gĩkuũ gĩetagĩrĩra arĩa meekaga arĩa angĩ maũndũ matarĩ ma kĩhooto. Na rĩĩrĩ, rĩu ndĩ mũhinyĩrĩrĩku mũno.”
Nao makĩmũkomia gĩtandainĩ gĩake, agĩkua nao makĩmũthika na gĩtĩĩo.
12 Thuuthainĩ rĩrĩa Ana aakuire, makĩmũthika kũrigania na mũthuuriwe. Naake Tobia na mũtumia wake magĩthaamĩra Ekibatana bũrũriinĩ wa Media kũrĩa maatũũranirie na Ragueli, ithe wa mũtumia wa Tobia.
13 Tobia akĩmenyerera Edina na Ragueli ũkũrũinĩ wao, na nĩamaheaga gĩtĩĩo kĩnene mũno. Mũicoinĩ rĩrĩa maakuire, akĩmathika kũu Ekibatana. Naake akĩgaya indo cia Ragueli, o ta ũrĩa aagaĩĩte cia ithe Tobiti.
14 Tobia aakuĩrĩire kũu Ekibatana arĩ na ũkũrũ wa mĩaka igana rĩa ikũmi na mũgwanja.
15 No mbere ya gũkua nĩaiguire ũhoro wa gũthũũkangio kwa Nineve ĩrĩa yatahirwo nĩ Nebukadinezaru na Ahasuerusu. Naake akĩgooca Ngai nĩ ũndũ wa ũrĩa aaherithĩĩtie andũ a Nineve na a Asiria. Hĩndĩ ĩrĩa yothe aatũũrire muoyo nĩacookagĩria Ngai ngaatho nĩ ũndũ wa ũrĩa eekĩĩte Nineve.