1 Rĩrĩa iruga rĩa ũhiki rĩathirire, Tobiti agĩĩta mũũriũ Tobia akĩmwĩra atĩrĩ, “Mwana wakwa, tigĩrĩra atĩ nĩwarĩha mũndũ ũcio ũrathiĩte rũgendo naake, na ndũkariganĩrwo nĩkũmuongerera.”

2 Naake Tobia akĩũria ithe atĩrĩ, “Baaba, ũkuona njagĩrĩirwo nĩkũmũrĩha mũigana ũrĩkũ? Ndingĩthũũra kũmũhe nuthu ya indo ciothe iria tũrokire nacio.

3 Amu nĩaranjookirie kũrĩ we ndĩ mwega na ndĩ mũgima, arahonia mũtumia wakwa, arangĩĩrĩra mbeeca kuuma kũrĩ Gabaeli, o na arakũhonia. Njagĩrĩirwo nĩkũmuongerera kĩndũ kĩigana atĩa nĩ ũndũ wa maũndũ macio moothe?”

4 Tobiti akĩmũcookeria atĩrĩ, “Mũhe nuthu ya indo iria aragũteithĩrĩirie gũũka nacio. Nĩagĩrĩirwo nĩcio.”

5 Kwoguo Tobia agĩĩta Rafaili akĩmwĩra atĩrĩ, “Oya nuthu ya indo iria wandeithĩrĩirie gũũka nacio. Nĩũcithũkũmĩire; gĩa na rũgendo rwa thaayũ ũkĩinũka.”

6 Naake Rafaili akĩmeeta eerĩ marĩ oiki akĩmeera atĩrĩ, “Goocaai Ngai na mũmenyithie andũ oothe ũhoro wa maũndũ meega marĩa Ngai amwĩkĩire, nĩ geetha o nao mamũinĩre na ũgooci. Reke andũ oothe mamenye ũrĩa Ngai eekĩĩte. Mũtikaanatigithĩrie kũmũgooca.

7 “Nĩ ũndũ mwega kũiga hitho ya mũthamaki, no nĩ wega kwanĩrĩra kũndũ guothe ũrĩa Ngai eekĩĩte, nĩ geetha agoocwo na atĩĩo.

“Ũngĩĩka wega, gũtirĩ ũndũ mũũru ũngĩgũkora.

8 “Nĩ wega makĩria kũhooya hatarĩ ũhinga na gũkenia Ngai na njĩra ya gũteithĩrĩria athĩĩni gũkĩra gũtonga na kwaga wĩhokeku. Nĩ wega makĩria kũhe athĩĩni gũkĩra kwĩigĩra thahabu.

9 Amu gũteithĩrĩria athĩĩni nĩkũhonokagia mũndũ kuuma gĩkuũinĩ, na gũgatheria wĩhia o wothe. Arĩa maheaga athĩĩni megũtũũra ũtũũro mũkinyanĩru,

10 no arĩa matũũraga ũtũũro wa meehia na wa waganu nĩ thũ cia ũtũũro wao.

11 “Nĩndarĩĩkia kũmwĩra atĩ hitho ya mũthamaki no mũhaka ĩigwo, na maũndũ marĩa Ngai eekaga no mũhaka mamenyithio andũ oothe. Rĩu nĩngũmũguũrĩria ũũma wothe itekũmũhitha ũndũ.

12 Tobiti, rĩrĩa ũrĩ na Sara mwahoire Mwathani-rĩ, nĩ niĩ ndatwarire mahooya maanyu mbere ya Ũrĩa Mũtheru. Nĩndeekaga ũguo hĩndĩ ciothe rĩrĩa wathikaga akuũ.

13 Ningĩ mũthenya ũrĩa wokĩrire ũgĩtiga irio ciaku ũtarĩĩte nĩguo ũgathike kĩimba-rĩ, Ngai nĩandũmire ngũgerie.

14 Na ningĩ no aandũmire njũke ngũhonie na honokie mũtumia wa mũũrũguo, Sara, kuuma mathĩĩnainĩ maake.

15 Nĩ niĩ Rafaili, ũmwe wa araika arĩa mũgwanja maikaraga mbere ya riiri wa Mwathani mehaarĩirie kũmũtungatĩra.”

16 Nao Tobiti na Tobia magĩĩtigĩra mũno, makĩgwa thĩ makĩinainaga nĩ guoya.

17 No Rafaili akĩmeera atĩrĩ, “Tigaai gwĩtigĩra; maũndũ moothe nĩ meega. No mũririkane kũgoocaga Ngai hĩndĩ ciothe.

18 Amu eendaga njũke ndĩmũteithĩrĩrie; ndiokire na ũndũ wakwa niĩ mwene. Kwoguo inagaai Ngai mũkĩgoocaga ũtũũroinĩ wanyu wothe.

19 Mĩthenyainĩ ĩyo yothe no kuoneka ndĩronekanaga harĩ inyuĩ ta ndĩrarĩaga kana nganyua, no nĩ kĩoneki mũronaga.

20 Rĩrĩa rĩothe mũrĩ gũũkũ thĩ ĩno, no mũhaka mũgoocage Mwathani Ngai na mũmũcookagĩrie ngaatho. Rĩu no mũhaka njooke kũrĩ ũrĩa wandũmire. Maũndũ moothe marĩa meekĩkĩĩte maandĩkeei ibukuinĩ.” Naake Rafaili akĩbuĩria rĩerainĩ.

21 Nao Tobiti na Tobia magĩkĩrũũgama; no matiacookire kũmuona rĩngĩ.

22 Makĩambĩrĩria kũina nyĩmbo cia ũgooci, magĩcookagia ngaatho nĩ ũndũ wa maũndũ moothe manene marĩa Ngai eekĩĩte rĩrĩa mũraika wake Rafaili aakoreetwo hamwe nao.