1 Nĩ wega kwaga kũgĩa na ciana,

na mũndũ akorwo na ũthingu.

Ũthingu ũtũũraga ũririkanagwo;

ũgaathagĩrĩrio nĩ Ngai o na andũ.

2 Ũthingu woneka, andũ nĩmegerekanagia naguo.

Waga, andũ nĩmawĩriragĩria.

Itĩĩnainĩ rĩa mĩndĩ na mĩndĩ ũtũũraga wĩkĩrĩĩtwo thũmbĩ ya ũhootani,

ũkoragwo ũkĩhũũranĩra iheeo iria cia goro.

3 Ciana cia eeki naaĩ

o na ingĩkorwo nĩcio nyingĩ no cia tũhũ.

Ciana cia ũmaraaya itikaagĩa na mĩri mĩrikĩru,

o na kana irũme wega.

4 Ciahota gũciarana na gũthegea kwa ihinda,

no-rĩ, tondũ itiĩkinyĩire-rĩ, nĩirĩinainagio nĩ rũhuuho,

na kĩhuuhũkanio kĩnene gĩacikora no gĩgaacikũũra.

5 Ciana ciao iriunĩkangaga irĩ njĩthĩ,

nayo mbeũ yacio ĩgatuĩka kĩndũ gĩtarĩ kĩene;

tondũ wa gũkorwo itarĩ ngũrũ, irĩkoragwo irĩ kĩndũ gĩthaahu.

6 Ciana iria iciarĩĩtwo na ũtharia

igaatuĩka aira rĩrĩa Ngai agaatua ciira,

nĩ ũndũ wa mahĩtia marĩa aciari aacio meekire.

7 Mũndũ ũrĩa mũthingu-rĩ,

o na angĩkua hingo yake ĩtakinyĩĩte

no akeeyonera ũhuurũko.

8 Ũingĩ wa matukũ maake

tiguo ũtuaga ũkũrũ kĩndũ gĩa gũconokerwo.

9 Ũingĩ wa mĩaka-rĩ,

tiguo gĩthimi kĩrĩa kĩa biũ gĩa ũtũũro,

ũũgĩ na ũthingu nĩcio gĩthimi gĩa ũkũrũ.

Ngerekano ya mũndũ mũthingu

10 Ũũgĩ nĩguo mbuĩ cia mũndũ.

Ũtũũro ũtangiunwo mũtĩ nĩguo ũkũrũ ũrĩa mũkinyanĩru.

11 Mũndũ mũthingu aageragia gũkenia Ngai,

naake Ngai akĩmwenda;

rĩrĩa aikaire gatagatĩ ka andũ eehia, akĩoywo.

Oirwo nĩ geetha ũũru na ũhinga itikahĩtithie meciiria maake na ngoro yake.

12 Nĩ gũkorwo maguucĩrĩria ma ũũru

nĩkũhumbĩrĩra mahumbagĩrĩra maũndũ marĩa meega,

nayo thuti ya indo, nĩbuthagia ngoro iria nũngĩrĩru.

13 Mũndũ ũcio tondũ wa gũkinyĩra ũthingu na ihinda iniini ũguo-rĩ,

nĩakĩonire ũtũũro mũraaya.

14 Na tondũ roho wake nĩwakenagia Ngai,

nĩkũmuoya aamuoire narua

amũthengie ũũruinĩ ũrĩa wamũthiũrũrũkĩirie.

No andũ moonaga na matimenye.

Mũgambo ũyũ ndwatoonyaga ngoroinĩ ciao atĩ:

15 ũtugi na thaayũ nĩcio cietereire andũ arĩa aamũre a Mwathani

na arĩa athingu meetereire kũgitĩrwo nĩ we.

Marĩĩkĩrĩrio ma arĩa aaganu

16 Mũndũ ũrĩa mũthingu akua nĩ ciira atuagĩra andũ arĩa eeki naaĩ maatigwo muoyo.

Ũthingu wa mũndũ mwĩthĩ nĩũciirithagia

mĩaka ĩrĩa mĩingĩ ya mũndũ mũkũrũ mwĩki naaĩ.

17 Andũ moonaga marigĩrĩrio ma mũndũ ũrĩa mũthingu

na matimenye kĩrĩa Ngai amũigĩire,

o na kana kĩrĩa gĩatũma amũtware ũhuurũkoinĩ.

18 Meroragĩra makoinanĩra riitho,

no Mwathani nĩakaamathekerera.

19 O ro ica ikuhĩ marĩtuĩka ciimba itarĩ na gĩtĩĩo,

na kĩndũ gĩa gũthekagĩrĩrwo tene na tene gatagatĩ ka andũ arĩa akuũ.

Mwathani akaamaharagania kuuma mĩthingi yao

na nĩkũharagana makaaharagana o biũ

manyiitwo nĩ mathĩĩna na mariganĩre o kũriganĩra.

20 Magaathiĩ makĩinainaga gũtarĩrwo meehia maao,

na waganu wao ũkaamaconora o mbereinĩ ya maitho maao.